Бирлашган Араб Амирликлари Исроил ва Сурия ўртасидаги музокаралар учун махфий алоқа каналини ташкил этди. Бу ҳақда Reuters агентлиги вазиятдан хабардор учта манбага асосланиб маълум қилди.
Агентликнинг Сурия хавфсизлик кучларидаги суҳбатдоши ва Яқин Шарқ разведка хизматларидан бирининг вакилига кўра, Тель-Авив ва Дамашқ ўртасидаги билвосита алоқалар хавфсизлик ва разведка масалаларини ҳал этишга, шунингдек, расмий муносабатларга эга бўлмаган икки давлат ўртасидаги ишончни мустаҳкамлашга қаратилган.
Маълумотларга кўра, Сурия президенти Аҳмад аш-Шаръанинг 13 апрель куни БААга ташрифидан бир неча кун ўтиб бошланган музокаралар ҳозирда “техник масалалар” атрофида олиб борилмоқда. Таъкидланишича, келажакда муҳокама мавзусига айланиши мумкин бўлган масалаларга ҳеч қандай чекловлар йўқ.
Қайд этилишича, воситачилик ҳаракатлари ўтган ҳафта Исроилнинг Сурияга берган зарбаларидан олдин амалга оширилган. Бу зарбалардан бири Дамашқдаги президент саройидан атиги 500 метр узоқликда содир бўлган.
Reuters аниқлик киритишича, Исроил бу зарбаларни Сурия раҳбариятига, Сурия друзлари - исломнинг бир тармоғи бўлган ва Сурия, Ливан ҳамда Исроилда издошлари мавжуд диний озчиликка қарши таҳдидларга жавобан юборилган хабар сифатида кўрсатган.
Сурия ва Исроил муносабатлари февраль ойи охирида, Дамашқ яқинидаги Жарамана аҳоли пунктида ўтиш даври ҳукумати хавфсизлик ходимлари ва ўзини ўзи мудофаа кучлари ўртасида тўқнашув содир бўлганида кескинлашди. Исроил шу муносабат билан Суриянинг янги ҳукумати этник-конфессионал озчиликларга босим ўтказаётганини маълум қилди ва қуролли кучларига Суриядаги друзлар жамоасини ҳимоя қилишни таъминлашни топширди.
30 апрель куни Исроил армияси Суриядаги экстремистик гуруҳ ячейкасига зарба берди. Исроил томони радикаллар друз аҳолисига ҳужум қилишни режалаштирганини таъкидлади
Изоҳ (0)