Birlashgan Arab Amirliklari Isroil va Suriya o‘rtasidagi muzokaralar uchun maxfiy aloqa kanalini tashkil etdi. Bu haqda Reuters agentligi vaziyatdan xabardor uchta manbaga asoslanib ma’lum qildi.
Agentlikning Suriya xavfsizlik kuchlaridagi suhbatdoshi va Yaqin Sharq razvedka xizmatlaridan birining vakiliga ko‘ra, Tel-Aviv va Damashq o‘rtasidagi bilvosita aloqalar xavfsizlik va razvedka masalalarini hal etishga, shuningdek, rasmiy munosabatlarga ega bo‘lmagan ikki davlat o‘rtasidagi ishonchni mustahkamlashga qaratilgan.
Ma’lumotlarga ko‘ra, Suriya prezidenti Ahmad ash-Shar’aning 13-aprel kuni BAAga tashrifidan bir necha kun o‘tib boshlangan muzokaralar hozirda “texnik masalalar” atrofida olib borilmoqda. Ta’kidlanishicha, kelajakda muhokama mavzusiga aylanishi mumkin bo‘lgan masalalarga hech qanday cheklovlar yo‘q.
Qayd etilishicha, vositachilik harakatlari o‘tgan hafta Isroilning Suriyaga bergan zarbalaridan oldin amalga oshirilgan. Bu zarbalardan biri Damashqdagi prezident saroyidan atigi 500 metr uzoqlikda sodir bo‘lgan.
Reuters aniqlik kiritishicha, Isroil bu zarbalarni Suriya rahbariyatiga, Suriya druzlari - islomning bir tarmog‘i bo‘lgan va Suriya, Livan hamda Isroilda izdoshlari mavjud diniy ozchilikka qarshi tahdidlarga javoban yuborilgan xabar sifatida ko‘rsatgan.
Suriya va Isroil munosabatlari fevral oyi oxirida, Damashq yaqinidagi Jaramana aholi punktida o‘tish davri hukumati xavfsizlik xodimlari va o‘zini o‘zi mudofaa kuchlari o‘rtasida to‘qnashuv sodir bo‘lganida keskinlashdi. Isroil shu munosabat bilan Suriyaning yangi hukumati etnik-konfessional ozchiliklarga bosim o‘tkazayotganini ma’lum qildi va qurolli kuchlariga Suriyadagi druzlar jamoasini himoya qilishni ta’minlashni topshirdi.
30-aprel kuni Isroil armiyasi Suriyadagi ekstremistik guruh yacheykasiga zarba berdi. Isroil tomoni radikallar druz aholisiga hujum qilishni rejalashtirganini ta’kidladi
Izoh (0)