Дамашқдаги Эрон консуллигига Исроил ҳаво ҳужуми минтақада кенг кўламли урушга олиб келадиган “сўнгги томчи” бўлиши мумкин, деб ёзади CNN нашри.
CNN’га кўра, кўплаб давлатлар минтақада ўт очишни тўхтатишга ҳаракат қилган ва кенг кўламли урушнинг олдини олиш учун бор кучини сарфлаган. Бироқ Исроилнинг зарбаси минтақада жанговар ҳаракатлар авж олиши эҳтимолини кескин ошириши мумкин.
Аввалроқ Эроннинг БМТдаги ваколатхонаси Теҳрон халқаро ҳуқуқ доирасида Исроилнинг Дамашқдаги Эрон консуллигига ҳаво ҳужумига жавоб бериш қонуний ҳуқуқини ўзида сақлаб қолиши ҳақида маълум қилди.
1 апрель куни САНА агентлиги Исроил ҳаво кучлари Дамашқдаги уйга зарба бергани ҳақида хабар берди. Кейинроқ Эрон матбуоти Сурия пойтахти ғарбидаги Меззе хиёбонида жойлашган Эрон консуллиги биноси ўққа тутилганини маълум қилди. Эроннинг Суриядаги элчиси Ҳусайн Акбарийнинг сўзларига кўра, ҳужум оқибатида 5-7 киши ҳалок бўлган. Ўз навбатида, Ислом инқилоби қўриқчилари корпуси етти нафар ҳарбий маслаҳатчи, жумладан, генераллар Муҳаммад Ризо Зоҳидий ва Муҳаммад Ҳоди Ҳожи Раҳимий ҳамда беш нафар зобит ҳалок бўлгани ҳақида айтган.
Сурия ташқи ишлар вазири Файсал Миқдод Эрон дипломатик миссиясига ташриф буюриб, Исроилнинг мазкур ҳужумини қоралаган. Эрон ТИВ матбуот котиби Носир Канонийнинг таъкидлашича, Теҳрон “тажовузкорни қандай жазолаш”ни ҳал қилади. Қатар, БАА, Уммон ва Покистон ҳам Эрон консуллигига ҳужумни қоралаган. Россия ТИВ Исроилнинг хатти-ҳаракатлари мутлақо қабул қилиб бўлмайдиган ва тўхтатилиши кераклигини айтган.
Исроил армияси вакили брифингда Исроил ҳарбийларининг Дамашққа зарба бергани ҳақидаги маълумотга изоҳ беришдан бош тортган.
Изоҳ (0)