Бирлашган Араб Амирликлари (БАА) Ташқи ишлар вазирлигининг 8-октябр куни эълон қилган баёнотига кўра, HAMAS’нинг Исроил шаҳар ва қишлоқларига уюштирган ҳужумлари, шунингдек, аҳоли пунктларига ракета ҳужумлари “жиддий ва шиддатли кескинлик”ни юзага келтирди.
“Вазирлик Исроилнинг тинч аҳолиси ўз уйларидан гаровга олингани ҳақидаги хабарлардан ҳайратда. Тинч аҳоли вакиллари ҳамиша халқаро гуманитар қонунларга мувофиқ тўлиқ ҳимояга эга бўлиши ва ҳеч қачон можаро объектига айланмаслиги керак”, — дейилади баёнотда.
Вазирлик “зўравонлик авжига чиққани туфайли исроилликлар ва фаластинликларнинг ўлими” муносабати билан ҳамдардлик билдирди ва ҳар икки томонни кескинликни юмшатишга чақирди.
“Халқаро ҳамжамият мулоқот, ҳамкорлик ва биргаликда яшаш борасида минтақавий саъй-ҳаракатларни издан чиқаришга қаратилган зўравонлик уринишларига қарши қатъиятли бўлиши керак”, — дея қўшимча қилган БАА ТИВ ҳамда “вазиятни юмшатиш”, Исроил ва Фаластин ҳудудларида “тинчликни тиклаш учун барча минтақавий ва халқаро ҳамкорлар билан яқин алоқада бўлишини” билдирган.
Кўплаб араб давлатлари Исроилни айблади
2020 йилда Исроил билан муносабатларни нормаллаштирган биринчи Форс кўрфази давлатига айланган БААнинг позицияси минтақадаги аксарият араб давлатлари изоҳларидан кескин фарқ қилади. Улардан баъзилари, хусусан, Эрон ва Сурия 7-октябр куни HAMAS’нинг Исроилга ҳужумини очиқдан очиқ қўллаб-қувватлади, баъзилари эса вазиятнинг кескинлашишида Исроилнинг ўзини айблади.
Саудия Арабистони, Кувайт, Ироқ, Қатар ва Уммон ўз баёнотларида HAMAS ҳужуми “давом этаётган оккупация ва Фаластин халқини қонуний ҳуқуқларидан маҳрум қилиш натижаси” эканини таъкидлади.
Саудия Арабистонининг баёноти эса бир оз вазмин бўлди – унда “икки томон ўртасидаги кескинлашувни зудлик билан тўхтатиш, тинч аҳолини ҳимоя қилиш ва ўзини назоратда ушлаш” талаб қилинган. Ғарб давлатларининг аксарияти Исроилни сўзсиз қўллаб-қувватлашини билдирган.
Изоҳ (0)