Сурия президенти Башар Асад Ғазо секторидаги ҳарбий ҳаракатларга барҳам бериш учун араб ва ислом дунёси давлатларини Исроил билан муносабатларни тўхтатишга чақирди. Бу ҳақда у Ар-Риёдда бўлиб ўтган Араб давлатлари лигаси ва Ислом ҳамкорлик ташкилоти саммитида сўзлаган нутқида айтиб ўтди.
“Агар бизда босим ўтказиш учун ҳеч қандай ҳақиқий воситалар бўлмаса, кейинги қадамларни ташлашдан маъно йўқ. Ҳар қалай бизда сиёсий воситалар мавжуд. Аввало сионистик тузилмалар билан ҳар қандай сиёсий алоқаларни тўхтатиш керак”, — деган Сурия президенти.
Унинг сўзларига кўра, Исроил билан муносабатларни тиклаш шарти Ғазо секторидаги “тажовузни тўхтатиш” бўлиши керак.
Reuters агентлиги манбаларига кўра, БАА Исроил билан дипломатик муносабатларни узишни режалаштирмаяпти, бироқ можаро янада авж оладиган бўлса, буни амалга ошириши мумкин. Айни пайтда Яқин Шарқ дипломатларидан бири БАА Исроил билан барқарор иқтисодий ва ҳарбий алоқаларини йўқотмоқчи эмаслигини таъкидлаган.
Тhе Economist нашрининг ёзишича, Саудия Арабистони Исроил билан муносабатларни нормаллаштириш учун эшикни ёпмаяпти. Америка бу йил кўп вақтини Саудия Арабистони Исроилни тан оладиган келишувга эришиш учун сарфлади. Бунинг эвазига қироллик Америка билан мудофаа шартномаси тузмоқчи эди.
Қатар ҳам Америка иттифоқчиси, ҳам ҲАМАС тарафдори. Бу давлат ҳали ҳам Америка учун фойдали бўлиши мумкинлигини кўрсатиш учун курашмоқда.
Изоҳ (0)