Япониянинг Токио ва Осака орасида қатнайдиган энг гавжум “Синкансен” тезюрар поездлар йўналиши бир метрли илон туфайли издан чиқди. Бу ҳақда The Guardian газетаси хабар берди.
Маълумотларга кўра, илон электр узатиш линияси симига ўралиб қолган. Натижада қисқа туташув юз берган. Бу эса юзлаб йўловчиларни ташиётган поездларнинг тўхтаб қолишига сабаб бўлган. Шундай бўлса-да, вагонларнинг ўзида электр таъминоти узилмаган - чироқлар ва кондиционерлар ишлашда давом этган.
Таъкидланишича, вазият 30 апрелда мамлакатда “Олтин ҳафта” - японлар бутун мамлакат бўйлаб саёҳат қиладиган байрамлар кетма-кетлиги бошланиши атрофида юз берган. Одатда бу даврда маҳаллий аҳоли қариндошларига меҳмонга боради ёки таътилга чиқади. Осакада эса “Экспо-2025” халқаро кўргазмаси ўтказилмоқда.
“Мен ойига бир неча марта синкансендан фойдаланаман, аммо электр узилиши туфайли тўхтаб қолишга биринчи марта дуч келдим”, дейди Токиога қайтаётган 46 ёшли Сатоши Тагава.
Маълумот учун, Токио, Нагоя ва Осакани боғловчи йўналишда кунига 370 дан ортиқ поезд қатнайди ва ўртача 430 000 йўловчини ташийди. Соатига 285 км тезликда ҳаракатланади.
Ушбу ҳолат “Синкансен” поездларини кечиктирган биринчи ҳолат эмас.
Ўтган йилнинг апрель ойида ҳам Нагоя-Токио поезди вагонидаги 40 сантиметрли илон йўловчиларни ваҳимага солган эди. Ходимлар жониворни топа олмаган ва вагон алмаштирилган, бу эса 17 дақиқалик кечикишга олиб келган.
2009 йилда ҳам илон электр узатиш линиясига чиқиб қолгани туфайли электр таъминоти узилган ва Токио билан Фукушима орасидаги поездлар тўхтаб қолган.
Изоҳ (0)