Агар Россия президенти Владимир Путин 15 май куни Туркияга Россия ва Украина ўртасидаги учрашувга келса АҚШ президенти Дональд Трамп ҳам Истанбулга бориши мумкин. Бу ҳақда АҚШнинг Украинадаги махсус вакили Кит Келлог маълум қилди.
“Умид қиламизки, Путин жаноблари у ерда бўлади. Шунда Трамп жаноблари ҳам ташриф буюради. Бу ғоят муҳим учрашув бўлади”, деди Келлог Fox Business телеканалига берган интервьюсида.
Бундан олдин АҚШ маъмурияти вакили CNN телеканалига, агар Путин Украина бўйича музокараларда иштирок этишга қарор қилса, Трампнинг Истанбулга сафари амалга ошиши мумкинлигини айтган эди.
Унинг сўзларига кўра, АҚШда бўлажак учрашувда муҳокама қилиниши лозим бўлган “шартлар рўйхати” мавжуд. Вашингтон можаро томонлари “баъзи ён беришларга” бориши муҳимлигини таъкидлаб ўтди.
Россия президенти Владимир Путин 15 май куни Истанбулда Украина билан тўғридан тўғри музокараларни бошлашни таклиф қилганди. Украина президенти Владимир Зеленский мазкур музокараларда Путинни шахсан кутишини айтди.
АҚШ президенти Дональд Трамп Россия ва Украина вакиллари ўртасида учрашувлар бўлиб ўтиши мумкин бўлган Истанбулга ташриф буюриш имкониятини кўриб чиқаётганини маълум қилди.
Изоҳ (0)