АҚШ вице-президенти Ж.Д. Ванс Fox News телеканали билан суҳбатда Россиянинг Украинага нисбатан ҳудудий даъволарига тўхталиб, уларни асоссиз деб атади. Сиёсатчи, шунингдек, Қўшма Штатлар ҳар қандай сценарийда ҳам Украина суверенитетини сақлаб қолиш тарафдори бўлиб қолишини айтди.
“Россия ҳали эгалламаган ҳудудларни ҳадя сифатида олишни кутмаслиги керак”, деди Венс.
У бу фикрни Россиянинг тинчлик музокараларидаги позицияси ва Вашингтоннинг бу борадаги муносабати ҳақидаги саволга жавобан айтди.
Венснинг билдиришича, АҚШ Россия ҳаддан ташқари кўп талаблар қўйишини кутганди.
“Ҳамма билган эди — Россия ҳаддан ташқари кўп нарса сўрайди. Чунки улар фронт чизиғида ўзларини ғолиб сифатида ҳис қилишмоқда”, деди у.
Венс, шунингдек Украина “ишлари яхши кетмаётгани” учун сулҳга рози бўлишини айтди.
“Биз Украина қулашини хоҳламаймиз. Биз, албатта, унинг суверен давлат бўлиб қолишини истаймиз. Аммо Россия ҳали забт этмаган ҳудудни шунчаки сўрай олмайди”, деган сиёсатчи.
АҚШ вице-президенти Оқ уйнинг музокаралардан чиқиши эҳтимолига ҳам тўхталди. Унинг таъкидлашича, агар Россия бу жараёнда самимий бўлмаса, Вашингтон воситачилик ролидан воз кечади.
“Биз бошиданоқ Россиянинг дастлабки талаблари ҳаддан ташқари юқори бўлишини билар эдик. Улар ўзларини ъмўтадилъ кўрсатиш учун кўп нарсани сўрашади. Бу мени хавотирга солмайди. Аммо агар улар жараёнда ҳалол иштирок этмаётганини билсак, албатта, музокаралардан чиқиб кетамиз”, деди вице-президент.
Шунга қарамай Венс музокараларнинг ўзини муҳим силжиш деб ҳисоблайди. Унга кўра, Россиянинг тинчлик режасини таклиф қилгани ҳам, Украинанинг аниқ таклифлар билан чиқаётгани ҳам ижобий жараёндир.
“Биз ушбу икки томон ўртасида масофани қисқартиришга ҳаракат қилишимиз керак. Бу узоқ муддатли тинчликка эришиш йўлидаги ягона чорадир. Ҳозирча керакли нуқтага етмадик, аммо бу борадаги ҳаракатларда давом этамиз”, дея сўзларини якунлади у.
Тинчлик музокаралари
Россия ва Украина ўртасидаги урушни тўхтатиш бўйича музокаралар АҚШ воситачилигида давом этмоқда. Вашингтон агар ҳеч қандай натижа бўлмаса, воситачи ролидан воз кечиши мумкинлигини бир неча бор таъкидлаган.
Бу орада Украина АҚШ томонидан илгари сурилган 30 кунлик тўлиқ сулҳ режасига розилик берди. Аммо Россия буни рад этиб, қатор шартларни илгари сурган.
Изоҳ (0)