Франция ҳукумати АҚШда илмий тадқиқотларни молиялаштириш қисқартирилиши шароитида америкалик олимларни ўз мамлакатида қабул қилиш учун 100 миллион евро ажратишни режалаштирмоқда. Бу ҳақда Франция президенти Эммануэл Макрон маълум қилди.
Фото: AP Photo
Франция президенти Эммануэл Макрон Дональд Трамп сиёсатидан норози бўлган америкалик олимларга Европага кўчиб келишни таклиф қилди.
“Иқтисодий модели эркин фан ва инновацияларга шунчалик таянадиган бу буюк демократия… Бундай хатога йўл қўйишини ҳеч ким тасаввур қила олмас эди. Агар эркинликни қадрласангиз, бу ерга келиб тадқиқотларингизни олиб боринг. Бунинг учун давлат қўшимча равишда 100 миллион евро ажратади”, деди Макрон.
Унинг сўзларига кўра, Европа олимлар учун бошпанага айланиши керак.
“Мақсад - номзодларнинг сифатларини ҳисобга олган ҳолда зарур миқдордаги тадқиқотчиларни жалб этиш. Докторантлар ва ёш профессорлардан тортиб Нобель мукофоти совриндорларигача”, деди Франция Президенти.
Европа Иттифоқи мамлакатлари ва Буюк Британия Америка маъмуриятининг давлат харажатларини қисқартириш сиёсати фонида АҚШдан кўплаб олимларнинг Европа илмий-тадқиқот ва таълим муассасаларига ўтишини кутмоқда.
Трампнинг Гарвард университетига қўйган талаблари
Америка ҳукумати 11 апрель куни Гарвардга расмий мактуб йўллаб, университет агар кенг кўламли ислоҳотларни амалга оширса, федерал молиялаштиришни сақлаб қолиши мумкинлигини билдирган. Акс ҳолда деярли 9 миллиард долларлик молиявий ёрдамни тўхтатиш билан таҳдид қилган.
Трамп маъмуриятининг фикрича, ўтган йили Ғазо секторидаги урушга қарши ўтказилган намойишлар пайтида Гарвард ва бошқа Америка олий ўқув юртларида антисемитизмга йўл қўйилган. Шу сабабли Гарвард университетига қуйидаги талаблар қўйилган:
- бошқарув тизимини ислоҳ қилиш;
- илмий фаолиятдан кўра фаолликка (активизмга) берилган профессор-ўқитувчиларнинг таъсирини камайтириш;
- АҚШ қадриятларига нисбатан душманона муносабатда бўлган талабаларни қабул қилмаслик;
- шунингдек, хулқ-атвор қоидаларини бузган “грин карта” эгалари ҳақида полицияга хабар бериш.
Гарвард президенти Алан Гарбер 14 апрель куни университет ҳукуматнинг бу талабларини бажармаслигини маълум қилди. Шундан сўнг АҚШ ҳукумати университетга ажратилган 2,2 миллиард доллардан ортиқ миқдордаги грант ва шартномавий маблағларни музлатиб қўйди.
Изоҳ (0)