Археологлар Грузия ғарбида тахминан 10 минг йил аввал яшаган бола скелетини топди. Бу ҳақда маҳаллий нашр хабар берди.
Ноёб топилма Сачхер муниципалитетидаги Бонди ғорида аниқланган. Суяк қолдиқлари тош билан қопланган бўлиб, олимларнинг айтишича, бу энг қадимги дафн маросимларига хосдир. Скелет 12 ёшгача бўлган болага тегишли экани айтилмоқда.
Бонди ғори Грузия Давлат университети профессори Илья Николоз Тушабрамишвили бошчилигидаги экспедиция давомида ўрганилган. Қазилмалар Чиатур ўлкашунослик музейига топширилган. Яқин келажакда олимлар қадимги одам суякларидан ажратиб олинган ДНКни таҳлил қилиши керак бўлади. Генетик таҳлиллар хорижий лабораторияларда ўтказилади. Тадқиқотларга Буюк Британия, АҚШ ва Япония экспертлари жалб этилган.
Таҳлиллар илк миграция ва Европа протоцивилизациялари тарихига ойдинлик киритиш имконини беради. Бонди ғори ноёб археологик ёдгорликдир. Тушабрамишвили уни 2007 йилда очган. Ўшандан бери у ерда жуда кўп топилмалар: қадимги кучли зилзила излари, вулқон кули, қоятош расмлари ва дунёдаги энг қадимги ёши 32 минг йиллик калава топилган.
Изоҳ (0)