Дилшод Ахатов Ўзбекистоннинг Швейцариядаги фавқулодда ва мухтор элчиси этиб тайинланди. Бу ҳақда “Дунё” ахборот агентлиги хабар берди.
Қайд этилишича, элчи (қароргоҳи Берлин шаҳрида) 25 октябрь куни Швейцария президенти Виола Амердга ўзининг ишонч ёрлиқларини топширган.
Учрашувда президент сўнгги йилларда мамлакатлар ўртасида юқори даражадаги икки томонлама алоқалар сезиларли фаоллашганини таъкидлади. У Швейцария ҳукумати Ўзбекистонда амалга оширилаётган ислоҳотларни тўлиқ қўллаб-қувватлашини маълум қилган.
Давлат раҳбари фойдали қазилмаларни ўзлаштириш, “яшил” иқтисодиёт, “яшил” энергетика, сув ва энергияни тежаш технологияларини жорий қилиш, иқлим ўзгариши ва экология муаммолари оқибатларини бартараф қилиш, касбий таълим тизимида Швейцария дуал таълим моделини жорий қилиш борасида ҳамкорликка тайёрлигини маълум қилди.
Дилшод Ахатов 2023 йилнинг октябрида Ўзбекистоннинг ГФРдаги элчиси сифатида Германия президенти Франк-Валтер Штайнмаерга ишонч ёрлиқларини топширган эди. Шу тариқа, Ўзбекистоннинг Германиядаги элчиси Швейцарияда ҳам мамлакатнинг расмий вакили ҳисобланади. Берлинга тайинлангунига қадар, у 2020—2023 йиллар Ўзбекистоннинг Ҳиндистондаги элчихонасига раҳбарлик қилган.2010—2013 йилларда Ўзбекистоннинг Германиядаги элчиси, шунингдек, Швейцария, Чехия, Швеция ва Испанияда ўриндошлик асосида элчи бўлиб ишлаган.
Изоҳ (0)