Саудия Арабистонининг Буюк Британиядаги элчиси Холид бин Бандар ал-Сауд Яқин Шарқни минтақавий уруш остонасида, деб ҳисобламоқда. Бу ҳақда дипломат Саудия Арабистони нашрига маълум қилди.
“Бирор бир оптимистик ҳолатни топиш қийин. Минтақадаги вазият ёмонлашишда давом этмоқда. Ўйлайманки, биз 1973 йилдагидан кўра кўпроқ минтақавий урушга яқинмиз”, деди элчи.
Унинг фикрича, можаро эпицентрида Исроил ва Фаластин муаммоси турибди ва ҳар икки томон кескинлашувнинг олдини олишга масъул. Элчининг қўшимча қилишича, агар можаро бутун минтақани қамраб олса, бу бутун дунёга таъсир қилади.
“Урушларни тўхтатиш бўйича саъй-ҳаракатларни янгилаш вақти келди. Халқаро ҳамжамият томонидан кўпроқ босим керак”, деди саудиялик дипломат.
Аввалроқ Исроил мудофаа вазири Йоав Галлант Ливан билан шимолий чегарага янги кучлар жойлаштирилаётгани, у ерда “урушнинг янги босқичи” бошланаётганини айтганди.
Унинг таъкидлашича, мамлакатнинг шимолдаги урушдан мақсади “аниқ ва оддий”: шимолий шаҳарлар аҳолисининг ўз уйларига хавфсиз қайтишини таъминлаш. Галант ҳукумат ҲАМАС томонидан гаровга олинганларни унутмаслиги ва мураккаб вазиятга қарамай, жанубдаги вазифаларни бажаришда давом этишини айтди.
Изоҳ (0)