Ўзбекистоннинг АҚШдаги элчиси Жавлон Ваҳобов мамлакатнинг Бразилиядаги фавқулодда ва муҳтор элчиси сифатида тайинлангани тўғрисидаги ишонч ёрлиғи нусхасини Бразилиянинг АҚШдаги элчиси Нестер Форстерга топширди. Бу ҳақда «Дунё» агентлиги хабар берди.
Ўзбекистоннинг АҚШдаги элчихонаси маълумотларига кўра, маросимдан кейин Жавлон Ваҳобов ва Нестер Форстер ўртасида алоҳида суҳбат ташкил этилган. Нестер Форстер ўзбек дипломатини янги тайинлов билан табриклаб, Бразилияда сақланиб қолаётган пандемия ҳолати муносабати билан, шунингдек, Ўзбекистон элчисининг Бразилия Ташқи ишлар вазирлигида аккредитациядан ўтишдаги кечикишларнинг олдини олиш мақсадида Бразилия ТИВ раҳбарияти номидан ишонч ёрлиғи нусхасини олиш ваколати топширилганини маълум қилган.
Нестер Форстер Ўзбекистон—Бразилия муносабатларини ҳар томонлама ривожлантириш учун барча зарурий саъй-ҳаракатларни амалга оширишга тайёрлигини, қишлоқ хўжалиги, саноат ва машинасозлик соҳаларида қўшма савдо-иқтисодий лойиҳаларни ишлаб чиқишга қизиқишини ҳамда кадрлар тайёрлаш соҳасида шериклик алоқаларини ўрнатишга тайёрлигини тасдиқлаган.
Шунингдек, элчи Ўзбекистонда бизнес юритишнинг янги шартларини, ҳукумат томонидан мамлакат бозорига киришда, енгил саноат маҳсулотларини олиб киришда, шунингдек, қишлоқ хўжалигига қизиққан хорижий инвесторларга берилаётган имтиёз ва преференцияларни ижобий баҳолаган.
Таъкидлаш керакки, Ўзбекистон ва Бразилия ўртасидаги савдо-иқтисодий ҳамкорлик фаол ривожланмоқда, сўнгги икки йил ичида икки мамлакат ўртасидаги савдо ҳажми 78 фоизга ўсган ва Лотин Америкасининг энг йирик иқтисодиётига маҳаллий товарларни экспорт қилиш 7 баравар ошган.
Эслатиб ўтамиз, Жавлон Ваҳобов 2017 йилдан бери Ўзбекистоннинг АҚШдаги элчиси сифатида ишлаб келмоқда. Жавлон Ваҳобов, шунингдек, Ўзбекистоннинг Канададаги элчиси (қароргоҳи — Вашингтонда) ҳам ҳисобланади.
Изоҳ (0)