Хитой 2021 йилда “Толибон” ҳокимият тепасига келганидан бери Афғонистонга элчи тайинлаган биринчи давлат бўлди. Бу ҳақда Deutsche Welle хабар берди.
“Толибон” ҳукмронлиги остидаги Афғонистон ҳеч бир ҳукумат томонидан расман тан олинмаган. Хитой элчининг тайинланиши “Толибон” ҳукуматини расман тан олиш йўлидаги қадамми ёки йўқлигига аниқлик киритмади.
Кобулдаги расмий маросимда Хитой элчиси Чжао Син “Толибон” Бош вазири вазифасини бажарувчи Муҳаммад Ҳасан Охундга ишонч ёрлиқларини топширди.
Элчи Чжао Синнинг машинасини полиция отряди президент қароргоҳигача олиб борди. Уни форма кийган аскарлар ва “Толибон”нинг юқори мартабали амалдорлари кутиб олишди.
“Бу Хитой ва Афғонистон ўртасидаги мулоқот ва ҳамкорликни янада ривожлантиришга қаратилган Хитойнинг Афғонистондаги элчисининг нормал ротацияси. Хитойнинг Афғонистонга нисбатан сиёсати аниқ ва изчилдир”, — дейилади Хитой ТИВ баёнотида.
Муҳаммад Ҳасан Охунд ушбу тайинлов икки давлат муносабатларида “янги саҳифанинг бошланиши” бўлишига умид билдирди.
“Хитой Афғонистоннинг анъанавий дўстона қўшниси сифатида у билан турли соҳаларда дипломатик алоқалар, алмашувлар ва ҳамкорликни давом эттириб келган”, — дейилади Хитой Ташқи ишлар вазирлиги баёнотида.
“Толибон”нинг бош матбуот котиби Забиҳуллоҳ Мужоҳид элчининг тайинланишини олқишлади.
“Бу, шунингдек, бошқа мамлакатлар Ислом Амирлиги билан алоқага киришиши учун сигналдир. Биз яхши мулоқот орқали яхши муносабатлар ўрнатишимиз керак. Бу орқали олдимизда турган ёки келажакда пайдо бўладиган барча муаммоларни ҳал қила оламиз”, — деди у.
Хитойнинг Афғонистондаги аввалги элчиси Ван Юй 2019 йилда лавозимга киришган ва ўтган ой лавозимини тарк этган эди.
Изоҳ (0)