Украина ўт очишни тўхтатгандан кейингина Россия билан “ҳар қандай форматда” музокаралар столига ўтиришга тайёр. Бу ҳақда Украина президенти Владимир Зеленский маълум қилди.
Сиёсатчи музокараларда “ҳеч қандай боши берк кўча” бўлмаслиги муҳимлигини айтди. Украина президенти Қримнинг Россия томонидан ноқонуний аннексиясини ҳам тан олмаслигини таъкидлади.
Бу бизнинг ҳудудимиз, Украина халқи ҳудуди. Бу мавзуда гаплашадиган гапимиз йўқ — бу Конституциямизга зид, деди у.
Зеленский, шунингдек, Украинанинг НАТОга аъзо бўлишига фақат альянс таркибидаги давлатлар вето қўйиши мумкинлигини қайд этди. У АҚШнинг тинчлик музокаралари жараёнидан чиқиши эҳтимолига қуйидагича муносабат билдирди.
Биз Американинг бу ёрдамдан воз кечишини истамасдик, чунки бу нафақат ёрдам, балки разведка маълумотлари, баллистик ҳужумлар ва ҳаёт ҳақида ҳам. Умуман олганда, менимча, бу Украина учун стратегик ҳамкордан айрилиш бўлади...Агар Америка музокаралардан чиқиб кетса, бу унчалик яхши сигнал бўлмайди. АҚШ президенти Трамп Украина билан ҳамкорликни давом эттиришига ва Россияга босим ўтказишига умид қиламиз, деди сиёсатчи.
Трамп 20 апрель куни Россия ва Украина “шу ҳафта ичида” келишувга эришишига умид қилаётганини айтганди. АҚШ президенти уч кун ичида Украина бўйича тинчлик режасини оммага эълон қилади. Инсайдерларга кўра, Украина Россияга ҳудудининг 20 фоизини “де-факто” бериши мумкин.
Режа лойиҳасида ўт очишни тўхтатишни назорат қилиш учун халқаро тинчликпарвар кучларни жойлаштириш кўзда тутилган. Мониторинг нейтрал давлат вакилларидан иборат қўшма комиссия томонидан амалга оширилади.
Дастлаб Украина президенти Кремлга “фуқаролик инфратузилмасига узоқ масофали дронлар ва ракеталар орқали ҳар қандай ҳужумлардан 30 кун муддатга, кейинчалик узайтириш имконияти билан, воз кечишни” таклиф қилган эди. Россия президенти Владимир Путин эса таклифни ўрганишини айтган. У бунинг учун Киев билан тўғридан тўғри музокаралар олиб бориш кераклигини истисно қилмаган.
Изоҳ (0)