Россия норасмий каналлар орқали АҚШга Украинага босқинни тўхтатиш бўйича музокаралар олиб боришга, жумладан Киев учун келажакда эҳтимолий хавфсизлик чораларини кўришга тайёрлигини билдирган. Бу ҳақда Bloomberg агентлигига Кремлга яқин икки манба маълум қилди.
Уларнинг сўзларига кўра, Россия расмийлари ушбу “сигналларни” 2023 йил декабрида агентлик суҳбатдошлари исмини айтишдан бош тортган воситачи орқали Американинг юқори мартабали амалдорларига етказган.
Bloomberg манбаларининг таъкидлашича, Россия президенти Владимир Путин Украинанинг нейтрал бўлиб қолиши ва НАТОга қўшилмаслиги ҳақидаги талаблардан воз кечишни кўриб чиқиши мумкин. Бунинг эвазига Москва Киевдан сўнгги йилларда Россия Федерацияси томонидан босиб олинган ҳудудлар устидан Россия назоратини тан олишни талаб қилади.
АҚШ Миллий хавфсизлик кенгаши матбуот котиби Эдриен Уотсон унинг бўлими Bloomberg хабар қилган Россия позициясидаги ўзгаришлардан бехабарлигини айтди.
“Украина Россия билан музокаралар олиб бориш-бормаслик, уларни қачон ва қандай ўтказишни ўзи ҳал қилади”, — деди у.
Кремль матбуот котиби Дмитрий Песков агентликка берган изоҳида Путин Россия музокараларга тайёрлигини бир неча бор билдирганини айтди.
“Биз ўз мақсадларимизга эришишга қатъий қарор қилдик. Ва биз уларга дипломатик йўл билан эришмоқчимиз. Аммо бунинг иложи бўлмаса, уларга эришгунимизча ҳарбий амалиёт давом этади”, — дея қўшимча қилди у.
Bloomberg таъкидлашича, Америка расмийлари бундай таклифлар тафсилотларини билмайди ва Путиннинг ҳарбий ҳаракатларни тўхтатишга жиддий ёндашаётганини кўрмаяпти. Улар Россия сигналлари ҳақидаги хабарларга шубҳа билан қарамоқда, деб ёзди агентлик.
Россиянинг музокараларга очиқлиги ҳақидаги ишоралар – қанчалик самимий кўринмасин – Украина иттифоқчилари ўртасида бўлинишни келтириб чиқариши, Киевни яккалаб қўйиши ва президент Владимир Зеленскийнинг Россия қўшинларини Украинадан тўлиқ олиб чиқиб кетишни ўз ичига олган “тинчлик формуласини” қўллаб-қувватлашга қаратилган саъй-ҳаракатларига путур етказиши мумкин, дейилади хабарда.
Россия расмийлари Украина билан тинчлик музокараларига очиқ эканликларини бир неча бор таъкидлаганлар, лекин ўз шартларига кўра. Москва Киевни уруш тугашини муҳокама қилишни истамаганликда айблади. Украина расмийлари, ўз навбатида, Россия томонидан босиб олинган мамлакатнинг барча ҳудудларини қайтариш ниятида эканини билдирди.
Тhе New York Times газетасининг ёзишича, Владимир Путин 2023 йил сентябрь ойидан бошлаб турли дипломатик каналлар орқали Украинада ўт очишни тўхтатиш бўйича музокараларни бошлашга ва ҳарбий ҳаракатларни тўхтатишга тайёрлигини билдирмоқда.
Владимир Зеленский NYT нашрига изоҳ берар экан, у “Россия томонидан тинчликка эришиш йўлидаги фундаментал қадамларни” кўрмаётганини айтди. Унинг фикрича, Россия можарони музлатиш истаги ҳақида “ишоралар бермоқда”, чунки у кучини тиклаш ва Украинага яна ҳужум қилиш учун пауза қилиши керак.
Изоҳ (0)