АҚШ президенти Дональд Трамп Канада билан савдо музокаралари зудлик билан тўхтатилишини айтди. Бу ҳақда BBC хабар берди.
Маълум қилинишича, АҚШ йирик технологик компанияларга қарши солиқ солишни бошлайди. Музокараларни тўхтатиш қарори эълон қилинишида олдин бу икки қўшни давлатлар июль ойи ўрталарига қадар савдо битими тузиш устида ишлаётган эди.
Трамп 2025 йил бошида “савдо уруши”ни бошлаб юборган эди. У Канадани “иқтисодий куч” ёрдамида аннексия қилиш билан таҳдид қилганидан сўнг, иккала давлат ҳам бир-бирининг товарларига бож жорий қилганди.
АҚШ президенти 27 июнь куни технологик компанияларга солиниши режалаштирилаётган “оғир солиқлар” туфайли икки мамлакат савдо музокараларни тўхтатаётганини билдирган. Яқин бир ҳафта ичида АҚШ ва Канада чегарани кесиб ўтадиган товарларга янги тарифлар эълон қилиниши ҳам қўшимча қилинган.
“Канада билан савдо бўйича барча муҳокамалар дарҳол тўхтатилади. Биз Канадага яқин 7 кун ичида АҚШ билан савдода қандай бож ўрнатилиши ҳақида маълум қиламиз”, деди Трамп.
Аммо, Канада бош вазири Марк Карни журналистларга берган қисқа изоҳида музокаралар давом этишини билдирган.
“Биз канадаликлар манфаати учун бу мураккаб музокараларни давом эттирамиз”, деди вазир.
АҚШ Канадага 2024 йили рақамли хизматлар учун 3 фоизлик солиқ жорий этган эди. Шундан бери икки мамлакат муносабатлари бирмунча қийинлашган эди. Ушбу солиқнинг дастлабки тўлови шу душанба куни амалга оширилиши кутилмоқда. Ҳисоб-китобларига кўра, бу Амазон, Apple ва Google каби Америка компанияларига йилига 2 миллиард доллардан кўпроқ зарар келтиради.
Канада расмийлари бу масалани АҚШ билан савдо музокаралари доирасида ҳал қилишни кутаётган эди. Канада бош вазири Марк Карни ва Трампнинг нисбатан илиқ муносабатлари савдо музокараларида қўл келиши тахмин қилинаётган эди.
АҚШ Канаданинг асосий савдо шериги ҳисобланади. 2024 йили АҚШ мамлакатдан узоқ муддатли эркин савдо шартномаси доирасида 400 миллиард доллардан ортиқ товар сотиб олган.
Аммо Трамп бу савдога 2025 йил бошида чегарадаги гиёҳванд моддалар савдосини баҳона қилиб, янги 25 фоизлик тариф билан зарба берган. АҚШнинг автомобиллар, пўлат ва алюминийга жорий этган янги божлари ҳам икки давлат муносабатларни бузган. Масалан, автомобиль эҳтиёт қисмлари автомобиль тўлиқ йиғилгунга қадар АҚШ, Мексика ва Канада чегараларини бир неча бор кесиб ўтишга тўғри келади.
Изоҳ (0)