Шимолий кореялик қочқин мамлакат етакчиси Ким Чен Инни зўравонлик учун Сеул судига берди. У ҳибсда дуч келган зўравонликлари учун мамлакат президентига фуқаролик ва жиноий айбловлар қўймоқда. Бу ҳақда BBC хабар берди.
Чой Мин Кюнг 1997 йилда шимолдан Хитойга қочиб кетган, аммо 2008 йилда мажбуран ватанига қайтарилган. У ҳибсда жинсий зўравонлик ва қийноқларга учраганини айтган. Чой 2012 йилда яна Шимолий Кореядан қочиб, Жанубий Кореяга жойлашган. Унинг таъкидлашича, бошидан ўтказган руҳий зарбаларининг таъсири ҳали ҳамон сақланиб қолган. Ҳозирда у дори-дармонларга боғланиб қолган.
Чой Мин Кюнг 11 июль куни Сеулда илк бор Шимолий Корея раҳбарига қарши иш қўзғатади. Аёлга Жанубий Кореяда жойлашган ҳуқуқни ҳимоя қилиш гуруҳи ёрдам бермоқда. Жанубий Корея судлари илгари ҳам шунга ўхшаш ҳолатлар бўйича ҳукм чиқарган. Лекин бундай ҳукмлар асосан рамзий маънога эга бўлиб, Пхеньян томонидан эътиборсиз қолдирилган.
Қочқиннинг даъвосида Ким ва Пхеньяннинг яна 4 нафар расмийси номи келтирилган. Сеулнинг ҳуқуқни ҳимоя қилиш ташкилоти бўлган Шимолий Корея Инсон ҳуқуқлари бўйича маълумотлар базаси маркази (NKDB) Чой хонимнинг даъвосини БМТ ва Халқаро жиноий судга олиб чиқишни ҳам режалаштирган.
“Мен ушбу кичик қадам эркинлик ва инсон қадр-қимматини тиклаш учун пойдевор бўлишини чин дилдан истайман. Бу шафқатсиз тузумдан бошқа бегуноҳ шимолликлар азият чекмасин. Шимолий Корея режимининг қийноқ қурбони ва омон қолган шахс сифатида мен Ким сулоласини инсониятга қарши жиноятлар учун жавобгарликка тортиш учун катта масъулиятни зиммамга оламан”, деди Чой.
Йиллар давомида халқаро ҳуқуқ ташкилотлари Шимолий Корея ҳукуматини суиистеъмол қилиш, жинс ва синфга асосланган тизимли камситиш ва бошқа инсон ҳуқуқларининг бузилишида айлаб келмоқда.
Сеул суди 2023 йилда шимоллик 3 нафар фуқаронинг ҳар бирига Пхеньяндан 36 минг доллар ундириб бериш ҳақида ордер чиқарган. 2024 йилда эса Шимолий Корея ҳукумати 5 та кореялик япон қочоқларининг ҳар бирига 100 миллион вон тўлашга буюрилганди. Улар 1960—1980 йилларда репатриация дастури доирасида Япониядан Шимолий Кореяга қайтган минглаб одамларнинг бир қисми бўлган. Пхеньян бу иккала даъвога ҳам жавоб бермаган.
Изоҳ (0)