Россия президенти Владимир Путин илк бор унинг мамлакатида Шимолий Корея ҳарбийлари борлиги ҳақидаги хабарларга муносабат билдирди. Бу ҳақда “Интерфакс” хабар берди.
Путин тегишли саволга жавоб берар экан, КХДР билан стратегик ҳамкорлик тўғрисидаги шартномани эслатиб ўтди.
Бугун, менимча, бизнинг стратегик ҳамкорлик тўғрисидаги шартномамиз ратификация қилинди. Унда 4-модда мавжуд. Биз Шимолий Корея раҳбарияти келишувларимизга жиддий ёндашишига ҳеч қачон шубҳа қилмаган эдик. Бу модда доирасида нима ва қандай йўл тутишимиз — бизнинг ишимиз, деди у.
Путин, шунингдек, Шимолий Корея ҳарбийлари Россия ҳудудида экани ҳақидаги маълумотга ҳам изоҳ берди. Аввалроқ бунга ишора қилувчи сунъий йўлдош тасвирлари пайдо бўлганди.
Суратлар — жиддий масала. Агар суратлар мавжуд бўлса, демак, улар ниманидир акс эттиради. Эътиборингизни шунга қаратмоқчиманки, Украинадаги вазиятнинг кескинлашувига Россиянинг ҳаракатлари эмас, балки 2014 йилдаги давлат тўнтариши сабаб бўлди, уни эса биринчи навбатда АҚШ қўллаб-қувватлади, деди Россия президенти.
Жанубий Корея разведкаси маълумотларига кўра, Пхеньян Россияга 12 минг аскар жўнатиши мумкин ва уларнинг бир қисми аллақачон Узоқ Шарқдаги базаларга етиб борган. Улар эҳтимол Украина билан урушга жўнатилиши мумкин, шимолий кореялик ракета офицерлари эса аллақачон урушда қатнашаётгани айтилганди. Бироқ Шимолий Корея ўз аскарларини урушда иштирок этиш учун Россияга юборгани ҳақидаги маълумотни “асоссиз миш-мишлар” деб атаган.
Изоҳ (0)