Саудия Арабистони суверен жамғармаси бир нечта консалтинг компанияларига 1 триллион долларлик футуристик The Line (Линия) қурилиши лойиҳасини қайта таҳлил қилишни топширди. Бу ҳақда Bloomberg хабар берди.
Лойиҳа — 170 километр узунликдаги, 200 метр кенгликдаги ва 500 метр баландликдаги ётиқ осмонўпар шаҳар қурилишини ўз ичига олади. Фонд лойиҳанинг амалга оширилишини текшириш ва зарурат туғилса, ўзгартиришлар киритишни сўраган. Bloomberg лойиҳани қайта кўриб чиқиш сабабларидан қуйидагиларни келтирган:
- нефть нархининг кутилган даражадан паст бўлиши,
- хорижий инвестициялар оқимининг сустлиги,
- бюджет тақчиллиги.
Ҳозирда Brent маркали нефть нархи бир баррел учун 71 долларга баҳоланмоқда, Саудия бюджетининг мувозанатли бўлиши учун эса 96 доллар талаб этилади. Катта инфратузилма лойиҳаларини молиялаштириш учун бу сумма ҳатто 113 долларга етиши лозим.
2024 йил апрель ойида Ар-Риёд The Line бўйича режаларни аллақачон қайта кўриб чиққан эди. Дастлаб 2030 йилгача ушбу шаҳарда 1,5 миллион киши яшаши режалаштирилган бўлса, ҳозир бу рақам 300 минг кишигача камайтирилган. Ҳозирда у ерда лойиҳада ишлаётган ишчилардан ташқари ҳеч ким яшамайди. Қурилиш 2021 йил октябрь ойида бошланган.
The Line — валиаҳд шаҳзода Муҳаммад бин Салмон ташаббуси бўлган Неом мега-лойиҳасининг бир қисми. Ушбу лойиҳа доирасида Трожена тоғ-чанғи курорти ва Синдалаҳ денгиз курорти каби объектлар ҳам қурилиши режалаштирилган.
Неом — Саудия Арабистонининг Vision 2030 стратегик режасининг асосий элементи бўлиб, мамлакатни нефтга қарам иқтисодиётдан халос этиш ва инвесторлар ҳамда сайёҳларни жалб қилишни мақсад қилган.
Изоҳ (0)