Арманистон Коллектив хавфсизлик шартномаси ташкилотидан (КХШТ) чиқиш бўйича якуний қарор қабул қилади. Бу ҳақда мамлакат ташқи ишлар вазири ўринбосари Ваан Костанян маълум қилди.
Агар КХШТ бўйича ҳамкорлар, жумладан Россия, кўп йиллар олдин Арманистоннинг суверен ҳудудига қилинган ҳужумдан сўнг муҳокама қилинган сиёсий баёнотларни бермаса, Арманистон якуний қарорини қабул қилади, деди Костанян.
Ташқи ишлар вазири ўринбосарига кўра, Ереван энди шама қилмай, балки очиқ-ойдин гапирмоқда. У Арманистон суверен давлат сифатида кейинги қадамлар учун зарур пайтни ўзи белгилашини айтди.
2024 йил февраль ойида бош вазир Никол Пашинян Арманистоннинг КХШТдаги иштироки музлатилганини эълон қилганди. Май ойида эса Арманистон Ташқи ишлар вазирлиги мамлакат ташкилот ишини молиялаштиришдан бош тортишини билдирган. 2025 йилнинг январь ойида Арманистон Ташқи разведка хизмати оммавий ҳисоботни эълон қилган. Унга кўра, мамлакат яқин келажакда КХШТда тўлақонли иштирок этишга қайтиш ниятида эмас.
Россия ва КХШТ билан муносабатлардаги келишмовчилик Тоғли Қорабоғда Арманистон ва Озарбайжон ўртасидаги жанговар тўқнашувлардан сўнг, Ереван иттифоқчилардан ёрдам сўраб расман мурожаат қилганида юзага келди. Бироқ, Москва устун рол ўйнайдиган ташкилот фақат “хавотир” ва “таъзия” билдириш билан чекланди. Шундан сўнг Пашинян КХШТни Ереванга ёрдам кўрсатмагани учун бир неча бор танқид қилди.
Изоҳ (0)