Гарвард университетининг 12 мингдан ортиқ битирувчиси Трамп маъмуриятининг 2,2 миллиард доллардан ортиқ федерал маблағ ажратишни чеклаш қарорига қарши чиқиб қонуний хабарга имзо чекди. Бу ҳақда CNN хабар берди.
Гарварднинг 1950—2025 йиллар давомидаги битирувчилари аmicus briefʼга имзо чекди. Бу учинчи томондан судга иш бўйича қўшимча маълумот берувчи даъво аризасига юборилган ҳуқуқий ҳужжат ҳисобланади. Бриф 9 июнь куни судга тақдим этилган.
Битирувчиларнинг фикрича, бундай ҳодиса Гарвард тарихида ҳали кузатилмаган. Гарвард ўзини ҳимоя қилмоқда ва ўз навбатида академик эркинлик, федерал молиялаштириш ва кампус назорати бўйича бошқа коллежлар ва университетлар учун намуна яратаётгани айтилди.
Гарвард апрель ойида Трамп маъмуриятини федерал молиялаштиришни музлатиш қарори юзасидан судга бериб, иш бўйича якуний қарорни тезроқ қабул қилишни сўраган. 21 июльда дастлабки эшитув бўлиши кутилмоқда.
“Биз битирувчилар сифатида ҳукуматнинг Гарвард ва бошқа олий таълим муассасаларининг асосий функциялари устидан назоратни ўрнатишидан чуқур хавотирдамиз. Тегишли жараёнларсиз ёки қонунда тан олинадиган асосларсиз — ва Конституция томонидан таъминланган эркинликлар ва у ўрнатган чекловларни бутунлай эътиборсиз қолдириб — ҳукумат Гарвардга зарар етказиш учун ўз ихтиёридаги барча кучларни ишга солиш ҳаракатини бошлади. Ҳукуматнинг пировард мақсади бизнинг таълим олиш, ўқитиш, фикрлаш ва ҳаракат қилиш эркинликларимизни чеклаш ва бу эркинликлардан ким фойдаланиши мумкинлигини белгилаш ҳуқуқига даъво қилишдир”, дейилган брифда.
Изоҳ (0)