«Мария» довулидан сўнг Пуэрто-Рикода ўлим сони 62 фоизга ўсиб, 4645 кишига етган. Бундай ҳисоб-китобларни Гарвард университети олимлари келтириб ўтди. Уларнинг фикрича, ушбу марҳумларни ҳам довул қурбонларига киритиш керак, чунки уларнинг вафоти орол инфратузилмасининг бузилиши билан боғлиқ. Бу ҳақда «РБК» хабар бермоқда.
Тадқиқотчилар гуруҳи 2017 йил сентябрида «Мария» довули ёғилган Пуэрто-Рико ороли аҳолиси ўртасида сўров ўтказиб, табиий офат оқибатларини баҳоламоқчи бўлди. Сўров ҳомийлари орасида Гарвард университетининг тиббиёт факультети ҳам бўлган.
Тадқиқотчилар эътироф этишича, жиддий ҳалокатдан кейин қурбонлар сонини ҳисоблаб чиқиш қийин. «Мария» довулидан ҳалок бўлганлар сони расман 64 киши деб эълон қилинган.
Довулдан кейин (20 сентябрдан 31 декабргача) ҳар қандай сабабларга кўра юз берган ўлимлар сонини ҳисоблаб чиқиш учун тадқиқотчилар Пуэрто-Рикодаги 3299 та тасодифан танланган уй хўжаликлари ўртасида сўров ўтказди. Аниқланишича, бу даврда жами 4645 киши ҳалок бўлган, ўлим сонининг ўсиши аввалги йилга нисбатан 62 фоизни ташкил қилган.
«Ўлим сони даражаси 2017 йил декабрининг охиригача юқори бўлиб қолган, барча ўлимларнинг учдан бири эса тиббий ёрдам кўрсатишнинг кечикиши ёки узилиши билан боғлиқ бўлган», — дейилади тадқиқот натижаларида.
Изоҳ (0)