АҚШнинг Гарвард университети қошидаги Сандерс театрида «аввал кулгуни қистовчи, кейинроқ ўйланишга ундовчи» илмий ютуқлар учун тақдим этилувчи Антинобель мукофоти – Шнобель тақдимотининг 25-маросими бўлиб ўтди. Бу ҳақда «Газета.ru» хабар беради.
Бу йил мукофот соҳибларининг ҳар бири «каттагина» мукофот пули – 10 триллион Зимбабве доллари учун берилган чекка эга бўлди.
Кимё бўйича Шнобель мукофоти товуқнинг қайнатилган тухумини қайтадан хом тухумга айлантириш усулини кашф этган олимларга топширилди.
Физика бўйича мукофот сут эмизувчиларнинг ўлчами уларнинг сийдик чиқариш учун сарфлаган вақтига боғлиқ эмаслигини исботлаган америкалик олимларга тақдим этилди.
Иқтисодиёт бўйича Антинобель мукофоти пора олишдан бош тортган полициячиларга мукофот пули беришни таклиф қилган Бангкок полицияси раҳбариятига берилди.
АҚШ ва чилилик олимлар товуққа дум протези уланса, у динозавр каби юра бошлашини аниқлаганлиги учун биология соҳасидаги Шнобель мукофотини қўлга киритди.
Психология ва энтомология соҳасидаги мукофот қайси ҳашаротларнинг чақиши энг оғриқли эканлиги ва инсон танасининг қайси органлари бундай чақишларга энг таъсирчан эканлигини аниқлаган тадқиқотчиларга топширилди.
Изоҳ (0)