АҚШнинг Гарвард университети собиқ ходими рафиқаси билан бирга инсон қолдиқларини ўғирлаб, сотганини тан олди. Бу ҳақда People хабар берди.
Маълум қилинишича, 57 ёшли Седрик Лож Гарвард тиббиёт мактабидаги морг менежери бўлиб ишлаган. Текширув давомида у 5 йил давомида инсон қолдиқларини ўғирлагани аниқланган. Қолдиқлар ўз жасадларини илм-фанга фойдаланиш учун васият қилган одамларга тегишли бўлган. Университет ходими бош, мия, тери ва суякларни сотган.
Седрикка бу ишда хотини Дениз ёрдам берган. Бир мижоз унга уч йил давомида 37 минг доллар тўлаган ва пул ўтказмаларида head number 7 (бош рақам 7) ва braiiiiiiins (миялар) деган хабарлар ёзган. Бир аёл Седрик билан моргда учрашиб, ундан иккита юзни олган ва бундан аввалроқ тери ҳам сотиб олган.
Текширув давомида Седрик тадқиқот ва ўқув мақсадларида фойдаланилган, аммо ҳали утилизация қилинмаган жасадларнинг қисмларини олгани аниқланган.
Биринчи марта бу ҳақда эшитганимда, кўнглим айниди. Одамларнинг бундай қилишлари шунчаки жирканчли ҳолат. Бу ақлсизлик, тасаввур қилиб бўлмайдиган нарса, деди тана аъзолари сотилган эркаклардан бирининг қизи. Эр-хотин Ложлар ҳукмини кутмоқда.
Изоҳ (0)