Машҳур Гарвард университети президенти Клодин Гей илмий ишларининг баъзи қисмларини кўчиргани аниқланди. Washington Post газетаси Гейнинг ишларида “сон-саноқсиз плагиат” топилганини хабар берди.
“Талабалар плагиат учун университетдан ҳайдалиши мумкин, лекин университет президенти аввалгидек ишлашда давом этиши мумкин эмас”, — деб ёзади Колумбия университети тилшунослик профессори Жон Маквортер.
Гей ҳамон ўз лавозимида қолмоқда ва ҳатто АҚШ собиқ президенти, университетнинг собиқ талабаси Барак Обама томонидан қўллаб-қувватланмоқда.
Яқинда Гарвард президенти ҲАМАСнинг Исроилга қилган ҳужумини қораламагани ва кампусдаги антисемитизм тартибсизликларини фақат “дискриминация” деб атагани учун танқид қилинганди. Энди бунга плагиат можароси қўшилди.
Washington Post шарҳловчиси Рут Маркуснинг таъкидлашича, Гей бутун параграфларни бошқа олимларнинг асарларидан кўчирган.
“Сиёсатшунос Клодин Гейнинг илмий ишларидаги муаммоли иқтибослар инкор этилмайдиган даражада кўп бўлди. Баъзилари бир хил конструкциядан фойдаланиш рамкасидан чиққан”, — деди у.
Ўз навбатида, New York Times’нинг таъкидлашича, Гейнинг фаолияти “прогрессив университет қора танли аёллар ҳақида гап кетганда икки томонлама стандартга эга деган таассурот уйғотади”.
Изоҳ (0)