Кун қисқариб бораётган бир пайтда, организмни табиий йўл билан қайта тиклаш керак. Тун узоқлиги туфайли эрталаб уйғониш қийинлашади ва мавсумий об-ҳаво организмга тобора кўпроқ ҳужум қилади. Овқатланишга тўғри ёндашув ушбу нохуш аломатларни енгишга ёрдам беради, деб ёзади Marie Claire.
Гардероб мавсумий кийимлар билан янгиланганидек, рацион ҳам ўзгариши керак. Совуқ ҳавода иммунитетни мустаҳкамлайдиган, қувватни оширадиган ва ҳар томонлама ўзимизни яхши ҳис қилишга ёрдам берадиган маҳсулотларни истеъмол қилиш керак. Grow Food парҳезшуноси Елена Свиридова қиш фаслида овқатланиш қоидалари билан ўртоқлашди, бу тетиклик ва иммунитетни сақлашга ёрдам беради.
Мукаммал кунлик овқатланиш режаси қандай бўлиши керак?
Нонушта
Тонгни сули ёрмаси, сут, қирғичдан ўтказилган олма, занжабил ва долчин, шунингдек, ёнғоқ ва уруғлардан тайёрланган тўйимли бўтқа билан бошлаш тавсия этилади.
Тушлик
Тушлик учун буғда ёки сабзавотли гарнир билан пиширилган балиқ истеъмол қилиш мумкин. Шунингдек, қовоқ ёки брокколи қўшилган иссиқ қаймоқли шўрва ҳам тавсия этилади. Овқатланиш оралиғида зарчавали латте, ўсимлик чойи, ёнғоқ ёки батончиклар истеъмол қилиш танлови мавжуд.
Кечки овқат
Кечки овқат енгил, озроқ ва айни пайтда фойдали бўлиши керак. Ёғда қовурилган овқатлар, ёғли балиқ ва гўшт, ширинлик, хамир овқат, мевалар, шунингдек, қайнатилган сабзи, лавлаги, картошкани истисно қилиш керак. Кечки овқат учун идеал вариантлар — товуқ филеси, ёғсиз мол гўшти, салатлар, творог ёки омлет ҳисобланади.
Ёғ миқдорини назорат қилинг
Рационга соғлом ёғларни қўшиш тавсия этилади: авокадо, зайтун ёғи, лосос, ёнғоқ, зиғир уруғи, қовоқ ва кунгабоқар. Ушбу маҳсулотлар қимматбаҳо ёғ кислоталарни ўз ичига олади.
Етарлича оқсил истеъмол қилинг
Озиқ-овқат оқсиллари билан организмга кирадиган аминокислоталар иммунитет тизимини тартибга солади, мушак ва терининг ҳолати учун жавобгар, қолаверса, асаб тизимини бошқаради. Оқсилли маҳсулотлар иммуннитетни тиклайди, бу айниқса турли вируслар фаоллашганда муҳим аҳамиятга эга. Оқсилнинг энг яхши манбалари парранда гўшти, балиқ, тухум, сут маҳсулотлари, ёнғоқлар ва баъзи дуккакли маҳсулотлардир.
Мураккаб углеводларга эътибор беринг
Мураккаб углеводлар нафақат организмни энергия билан таъминлайди, балки узоқ вақт давомида тўқлик туйғусини сақлаб қолади. Мавсумий мева ва сабзавотлардан ташқари, кунлик рационга дон, дуккаклилар, қовоқ ва макарон маҳсулотини қўшиш мумкин.
Ширинликларни рациондан чиқариб ташланг
Печенье, ширинлик, фастфудлар, оқ нон, шакар, шоколад қисқа муддатли тўқлик туйғусини беради, аммо жуда тез вақтда қайта овқатланиш истаги пайдо бўлади. Бу овқатлар кеч кузда рациондан чиқариб ташланиши керак. Айниқса, оддий шакар ва ёғларнинг комбинациясидан қочиш лозим.
Рационни фаслларга мослаштириш жисмоний ва руҳий саломатлик учун жуда муҳимдир. Ушбу оддий овқатланиш қоидалари кун давомида энергияни сақлашга ёрдам беради ва совуқ об-ҳавода иммунитет заифлашишининг олдини олади.
Изоҳ (0)