Жанубий Африка Республикаси АҚШ божхона тўловлари сабабли Осиё ва бошқа ҳудудларда қишлоқ хўжалиги маҳсулотларини сотиш учун янги бозорлар қидирмоқда. Бу ҳақда Bloomberg агентлиги мамлакат қишлоқ хўжалиги вазири Жон Стенхойзенга таяниб хабар бермоқда.
АҚШ президенти Дональд Трамп 1 августдан бошлаб ЖАРдан келтирилаётган барча товарларга 30 фоизлик импорт божини жорий этишни эълон қилганди. Июль ойи охирида ЖАР савдо вазири маҳаллий 702 радиостанциясига берган интервьюсида, АҚШ вакиллари божлар жорий этилиши муддати яқинлашаётгани муносабати билан республикани Оқ уйга янги, ўзгартирилган савдо битимини тақдим этишга ундаганини маълум қилди.
“Жанубий Африка АҚШнинг жазо тариқасидаги импорт божларидан зарар кўрган қишлоқ хўжалиги маҳсулотлари учун Осиё ва бошқа минтақаларда янги бозорлар очишга интилмоқда. Хитойга экспортни кўпайтириш устувор вазифа ҳисобланади... Шунингдек, Россия, Жанубий Корея, Филиппин, Япония ва Яқин Шарқ мамлакатлари ҳам кўриб чиқилмоқда”, дейди Стенхойзен.
Стенхойзеннинг таъкидлашича, Жанубий Африка қишлоқ хўжалиги маҳсулотлари етказиб берувчиларининг бир қисми 30 фоизлик божлар шароитида ҳам рақобатлаша олишини айтмоқда, чунки Жанубий Африка рендининг долларга нисбатан паст курси уларга маълум устунлик беради.
Агентликнинг қўшимча қилишича, Стенхойзен ЖАР цитрус саноати ва Европа Иттифоқи ўртасидаги санитария протоколлари бўйича “чўзилиб кетган низо”ни ҳал қилишга уринмоқда. Вазир Европа Иттифоқи билан ушбу протоколларни четлаб ўтишга имкон берадиган икки томонлама келишувга эришишга умид қилмоқда.
“Биз учун энг осон йўл - бу муаммони Европада ҳал қилиш. Шунда биз цитрус меваларнинг катта қисмини у ерга йўналтира оламиз”, дейди вазир.
Июль ойи бошида ЖАР президенти девони Жанубий Африка Республикаси Трампнинг товарларга янги импорт божлари жорий этилишини эълон қилиши муносабати билан АҚШ билан мувозанатли ва ўзаро манфаатли савдо алоқаларига эришиш учун дипломатик саъй-ҳаракатларга содиқлигини билдирганини маълум қилганди. Баёнотда, шунингдек, ЖАР АҚШ билан музокараларни давом эттираётгани қайд этилган.
Изоҳ (0)