Сурхондарё вилояти Бойсун тумани Кенгдала ўрмон хўжалиги бўлимига қарашли арчазорларга туташ ҳудудда ёнғин юз берди.
-2KgoirrR.avif)
Вилоят ФВБ матбуот хизматининг маълум қилишича, 17 июнь куни соат 17:45 да арчазорларга туташ ҳудудда қуруқ ўтлар ёнгани бўйича хабар келиб тушган. Шунга асосан зудлик билан ёнғин-қутқарув экипажлари воқеа жойига етиб бориб, тегишли хизматлар ва кўнгиллилар ҳамкорлигидаги ҳаракатлар натижасида 3 гектар майдондаги ёнғин ўчоғи 18 июнь куни соат 07:10 да бартараф этилиб, кенг майдонларга тарқалиши олди олинган.
Ёнғинни бартараф этишга вилоят ФВБдан 85 нафар шахсий таркиб, 4 та техника, Ўрмон хўжалиги бўлимидан 40 нафар ходим, 4 та техника, ИИБдан 6 нафар ходим, Мудофаа вазирлигидан 20 нафар ҳарбий хизматчи ва битта ҳарбий вертолёти, маҳаллий аҳолидан 40 нафар кўнгилли жалб этилган.
Шунингдек, содир бўлган ёнғинни бартараф этиш жараёнида ёнғин ўчоғини мониторинг қилиш учун чегара қўшинларининг учувчисиз учиш воситаларидан фойдаланилган.
“Ўзбеккосмос” агентлиги берган маълумотга кўра, июнь ойининг бугунги кунига қадар Республика миқёсида 1 605,4 гектар майдон ёқилиши билан боғлиқ 213 та ҳолат аниқланди. Бу Сурхондарё вилоятида 180 та (1 324,8 гектар), Сирдарё вилоятида 17 та (135,2 гектар), Тошкент вилоятида 3 та (58,2 гектар), Андижон вилоятида 3 та (18,5 га), Фарғона вилоятида 4 та (20,4 га), Жиззах вилоятида 2 та (21,3 га) ва Бухоро вилоятида 4 та (27,0 гектар) ташкил этмоқда.
Изоҳ (0)