Инсон ҳуқуқлари бўйича халқаро федерация (FIDҲ) ва унинг ҳамкорлари Халқаро жиноий суд прокуратурасидан олти нафар россиялик амалдор ва журналистларни ҳибсга олишга ордер беришни сўради. Улар инсониятга қарши жиноят содир этишда айбланмоқда.
Рўйхатга Россия Хавфсизлик кенгаши раиси ўринбосари Дмитрий Медведев, Президент администрацияси раҳбарининг биринчи ўринбосари Алексей Громов, телебошловчи Владимир Соловёв, РТ бош муҳаррири Маргарита Симонян, “Россия сегодня” медиа гуруҳи раҳбари Дмитрий Киселёв ва бошловчи Сергей Мардан киритилган.
Уларнинг барчаси Украинанинг тинч аҳолисига нисбатан нафрат кампаниясида қатнашган, ҳарбий жиноятлар ва Россиянинг бошқа ваҳшийликларини рағбатлантирган ҳамда қўллаб-қувватлаган”, — дейилади хабарда.
Баёнотга кўра, 2014 йилдан бери “Россия давлат телеканаллари, радиолари ва ижтимоий тармоқларида Украинани йўқ қилиш ва украиналикларга қарши репрессияга чақириқлар мунтазам бонг уриб келинмоқда”.
Инсон ҳуқуқлари бўйича халқаро федерация айбловларни эълон қилиш учун 2022 йил 24 февралдан 2024 йил 24 февралгача олти нафар мансабдор шахс ва тарғиботчиларнинг баёнотлари акс этган икки мингдан ортиқ видеоклипларни таҳлил қилди. 300 дан ортиқ баёнотлар инсониятга қарши жиноятга тенг нафрат нутқини ташкил этиши айтилмоқда.
ХЖС Путинни ҳибсга олишга ордер берганди
2023 йилнинг март ойида Халқаро жиноий суд Россия президенти Владимир Путин ва болалар ҳуқуқлари бўйича комиссар Мария Лвова-Беловани ҳибсга олишга ордер берган. Улар Украинанинг босиб олинган ҳудудларидан болаларни Россияга ноқонуний депортация қилганликда айбланмоқда.
2024 йил март ойида Россия Қора денгиз флоти қўмондони Виктор Соколов ва Россия Аэрокосмик кучларининг узоқ масофали авиацияси бошлиғи Сергей Кобилашни ҳибсга олишга ҳам ордер берилган.
Суд қарорида ордер қандай жиноятлар учун берилгани кўрсатилмаган. 2023 йил бошида Украина завфсизлик хизмати икки нафар юқори мартабали россиялик ҳарбийни Украинадаги тинч аҳолини объектларини ўққа тутганликда айблаганди. Улар орасида Кобилашнинг, шунингдек, Россия Қора денгиз флотининг собиқ қўмондони, адмирал Игор Осипов исми келтирилганди.
Изоҳ (0)