Хитойда суд Ханчжоу электрон тижорат маркази коммунистик партиясининг собиқ раҳбари Чжоу Цзянюнни порахўрликда айблаб, шартли ўлим жазосига ҳукм қилди. Бу ҳақда South China Morning Post хабар берди.
Амалдор олган пораларнинг умумий миқдори тахминан 25 миллион долларни ташкил қилган. Тергов мансабдор шахснинг коррупсион схемалардаги иштирокини исботлашга муваффақ бўлган. Манбага кўра, у ташкилотлар ва жисмоний шахслардан пул олган. Бунинг эвазига Чжоу Цзянюн ер билан боғлиқ муаммоларни ҳал қилишга ва қурилиш лойиҳаларини лойиҳалашда ёрдам берган.
У 2001 йилдан буён шундай шартномаларни имзолаб келади. Ўша пайтда у туман ҳокими ўринбосари лавозимида бўлган.
Сиёсатчининг ўлим жазоси икки йиллик синов муддатидан сўнг умрбод қамоқ жазосига алмаштирилиши ҳам истисно эмас. Бундан ташқари, Чжоу Цзянюн сиёсий ҳуқуқлардан маҳрум қилинади ва мулки мусодара қилинади.
Хитойда пора олганлик учун ўлим жазоси
Юқоридаги ҳолат Хитойда коррупция сабабли ўлим жазоси берилишининг ягона ҳолати эмас. Бунгача Хитойнинг Чанчун шаҳар суди хавфсизлик вазирлигининг партия қўмитаси собиқ аъзоси, собиқ генерал майор Лю Янпинни икки йиллик муҳлат билан ўлим жазосига ҳукм қилганди.
Амалдор умумий қиймати 234 миллион юан (тахминан 34,5 миллион доллар) миқдорида пора олганликда айбдор деб топилган.
Аввал ҳам Хитойда 117 миллион юан (қарийб 16,5 миллион доллар) пора олган собиқ вазир ўлим жазосига ҳукм қилинганди.
Изоҳ (0)