Қозоғистонда аҳоли ишда спиртли ичимлик ичган ҳокимни ҳимоя қилди

Қозоғистоннинг Павлодар вилоятидаги қишлоқлардан бирининг ҳокими Бауиржон Бўзтаев иш жойида спиртли ичимликлар истеъмол қилгани учун ўз лавозимини йўқотиш хавфи бор. Бу ҳақда Павлодар ахборот сайтига таяниб, “Дарё”нинг Қозоғистондаги мухбири хабар берди.

Ахлоқий кенгаш аъзолари қонунни қўпол бузгани учун ҳокимни ишдан бўшатмоқчи. Бауиржон Бўзтаев шу пайтгача раҳбарлик ва давлат хизматида ишлаган вақтида интизомий жазога тортилмаган. Бироқ бу гал Қозоғистон Давлат хизмати ишлари агентлиги раисининг ишонч телефонига қишлоқда яшовчи фуқаро қўнғироқ қилиб, мансабдор шахс маст ҳолатда навбатчилик қилаётганини айтган. Ахлоқ комиссари буни текширишга борган. Ҳоким тиббий кўрикдан ўтказилганда ҳаммаси ҳақиқат бўлиб чиққан. Шу билан бирга, ҳоким ўзини оқлашга уринмаган.

“Мен бу фактни тасдиқлайман. 15 март куни қишлоқда дарё тошди, тушдан кечгача сувни бошқа томонга йўналтиришди. Мен қаттиқ шамолладим ва спиртли ичимлик ичдим. Қилган ишимдан чуқур афсусдаман. Сизга ва қишлоқ аҳолисига бу ерда бўлишга лойиқлигимни яна бир бор исботлаш учун имконият беришингизни сўрайман”, — деди амалдор. 

Аммо ахлоқий кенгаш вакиллари давлат хизматчисининг иш жойида маст ҳолатда бўлиши қонунни қўпол равишда бузиш, деган хулосага келди. Эндиликда комиссия Бауиржон Бўзтаевни ишдан бўшатиш таклифи билан Экибастуз шаҳри ҳокимига мурожаат қилмоқчи. Қишлоқ аҳолиси ҳокимга нисбатан енгилроқ чоралар кўриш талаби билан мурожаат қилган.

Светлана Шестернёва, Олмаота