Тожикистонда 124 нафар мансабдорнинг фарзандлари армияга хизматга чақирилди
Тожикистон Мудофаа вазирлиги чақирув кампаниясининг бир ойи давомида мамлакат Қуролли кучларига чақириқ бўйича режа 70 фоизга бажарилганини маълум қилди, деб ёзади Asia Plus Тожикистон Бош прокуратураси сайтига таяниб.
Бу йил кузги чақирув даврида 124 нафар амалдор ва давлат хизматчиларининг ўғиллари ҳам армияга хизмат ўташга кетди. Улар орасида Файзаобод, Тожикобод, Рашт туманлари ва Бохтар шаҳри раҳбарлари, шунингдек, Бош прокуратура ҳисоб-молия бўлими бошлиғи, Жалолиддин Балхий, Мўминобод туманлари прокурорлари, Кўлоб шаҳри газрнизони ҳарбий прокурорининг ўғиллари бор.
Таъкидланишича, ўтган йили кузги чақирув кампанияси доирасида мансабдор шахслар ҳамда бошқа давлат хизматчилари ва ишчиларининг оилаларидан 299 киши, баҳорги чақирув даврида эса шундай оилалардан 120 киши армияга чақирилган.
«Бундан ташқари, шаҳар ва туман прокуратуралари, ҳарбий гарнизонлар ишчилари кўмагида фуқаролар ўз ихтиёри билан чақирув пунктларига келди ва ҳарбий хизматга жўнади, — дейилади Бош прокуратура хабарида. — Йилдан йилга армияда хизмат қилишдан бош тортаётган кишилар сони қисқармоқда, ҳарбий хизматни ўз ихтиёри билан ўташ истагидаги фуқаролар эса кўпаймоқда».
Эслатиб ўтамиз, Тожикистон мудофаа вазири Шерали Мирзо мамлакат армиясига чақирув кампаниясига тайёрланишга бағишланган йиғилишда мансабдор шахсларнинг фарзандларини ҳарбий хизматга жалб қилиш бўйича қатъий топшириқ берган эди.
Кузги чақирув кампанияси 1 октябрда бошланган бўлиб, икки ой давом этади.
Нашр қайд этишича, ҳар йили ҳарбий хизматга чақирув бошланиши билан, ижтимоий тармоқларда ёшларнинг хизматга жалб қилиниш учун қўлга олинишлари акс этган видеолар тарқалади, бу халқ орасида «ов» деб аталади.
Мудофаа вазирлиги «ов» уюштирилишини доим рад этиб келган, чақирув қоғозини олиб, ҳарбий комиссариатга келмаган ёшларни эса милиция мажбурий равишда у ерга олиб боришга ҳақли эканини таъкидлаган.
