Айрим ўзбекистонликлар БААга киришда ҳали ҳам қийинчиликларга дуч келаётгани аниқланди.
Ташқи ишлар вазири матбуот котиби Аҳрор Бурхоновнинг маълум қилишича, халқаро аэропортларда узоқ давом этган текширувлар туфайли фуқароларнинг ушбу аэропортларда узоқ вақт қолиб кетаётгани ҳақида яна мурожаатлар келиб тушди.
“Мамлакатимизнинг БААдаги дипломатик ваколатхоналаримиз томонидан ушбу ҳолатларни ҳал қилиш мақсадида фаол чоралар кўрилмоқда. Дипломатларимиз доимий равишда вазиятни мониторинг қилиб, БААнинг иммиграцион ва бошқа тегишли идоралари вакиллари билан узлуксиз музокаралар олиб бормоқда”, дейди ТИВ вакили.
Унинг қайд этишича, ушбу музокаралар фуқароларимизнинг мамлакат ҳудудига имкон қадар тезроқ ва муаммосиз киришини таъминлашга қаратилган бўлиб, масалани жойида ҳал қилиш учун барча саъй-ҳаракатлар амалга оширилмоқда.
Шу билан бирга, аэропортларда юзага келаётган кечикишлар ва текширувларнинг сабаблари аниқланмоқда, бу эса масаланинг келиб чиқиш илдизларини тушуниш ва келажакда бундай ҳолатларни олдини олишга ёрдам беради.
Фуқароларга имкон қадар қулайлик яратиш мақсадида Абу Даби шаҳридаги элчихона ва Дубайдаги Бош консулхона вакиллари доимий равишда маҳаллий аэропортларда бўлиб, ўзбекистонликларга кўмак бермоқда.
БААдаги турли аэропортлар орқали мамлакат ҳудудига кириб келаётган хорижликларнинг, шу жумладан Ўзбекистон фуқароларининг текширувлари чўзилиб кетгани ҳақида хабарлар 2 июнь куни тарқалганди. Ташқи ишлар вазири матбуот котиби буни тасдиқлаб, хавфсизлик чоралари кучайтирилгани сабабли аэропортларда текширув вақтлари чўзилиб кетаётганини билдирганди.
5 июнь куни БААда футбол бўйича Ўзбекистон миллий жамоаси ЖЧ-2026 саралаши 3-босқичи доирасида ушбу мамлакат жамоаси билан ўйнайди. Шу мақсадда аксарият ўзбекистонликлар мухлислик қилиш учун БААга йўл олганди. БАА — Ўзбекистон терма жамоалари ўртасидаги баҳс Абу Дабидаги “Ал-Наҳян” стадионида бўлиб ўтади.
Изоҳ (0)