Президент қарорига кўра “Ўзбекистон қайта суғурта компанияси” миллий қайта суғурта ташкилоти ташкил этилади.
23 майда имзоланган “Мамлакатимизда қайта суғурта тизимини янада такомиллаштириш чора-тадбирлари тўғрисида”ги президент қарорига кўра, қайта суғурта тизимини 2025 йилда янада такомиллаштиришнинг асосий мақсадлари этиб қуйидагилар белгиланди:
- миллий қайта суғурта бозори ҳажмини 4 триллион сўмга етказиш;
- қайта суғурта хизматлари экспортини камида 30 фоизга ошириш;
- халқаро ҳамкорликни кенгайтириш ва қайта суғурта соҳасига жалб қилинадиган инвестициялар ҳажмини 150 миллиард сўмгача ошириш.
Қарорга кўра, “Ўзбекистон қайта суғурта компанияси” миллий қайта суғурта ташкилоти суғурта фаолияти тўғрисидаги қонунчиликка мувофиқ барча қайта суғурта қилиш турларини амалга оширади.
Хорижий ва маҳаллий инвесторларнинг республика иқтисодиётига киритадиган тўғридан тўғри ва портфел инвестицияларининг ҳамда инвестиция лойиҳалари бўйича таваккалчиликларнинг комплекс қайта суғурта ҳимоясини таъминлайди.
Миллий қайта суғурта ташкилоти — бу суғурта компанияларининг ўз зиммасига олган йирик ёки юқори хавфли рискларни бошқа суғурта ташкилотларига, яъни қайта суғурталовчиларга топшириш орқали рискларни тақсимлаш ва молиявий барқарорликни таъминлашга хизмат қилувчи муҳим институционал тузилма ҳисобланади.
Изоҳ (0)