Бугун, 10 июль куни президент Шавкат Мирзиёев Тошкент шаҳар Шайхонтоҳур туманидаги “Инсон” ижтимоий хизматлар марказида бўлди.
Президент ахборот хизмати хабарига кўра, марказда 12 тоифадаги муҳтож инсонларга 100 дан ортиқ ижтимоий хизматлар кўрсатилмоқда. Мурожаатлар қабул қилиш, эҳтиёжни баҳолаш, хизматни белгилаш ва хизмат кўрсатиш жараёнлари инсонларга қулай тарзда йўлга қўйилган.
Қолаверса, ижтимоий хизматдан фойдаланувчининг кейинги ҳолати, ўзини ўнглаши ҳам мониторинг қилиб борилади. Барча жараёнлар рақамлаштирилган ва масъул ташкилотлар билан боғланган.
Шайхонтоҳурдаги марказда 25 нафар мутахассис ҳамда маҳаллаларда 51 нафар ижтимоий ходим фаолият кўрсатмоқда. Ногиронлиги бўлган болалар ва шахслар, ёлғиз кексалар билан манзилли тарзда иш юритилмоқда.
“Бу ер ҳар бир инсоннинг дарди билан яшайдиган, уларни рози қиладиган даргоҳ. Бу тизим орқали жамиятимизда ижтимоий адолат, инсон қадри қарор топади”, деган президент.
Марказ ҳудудида давлат-хусусий шериклик асосида “Имкониятлар олами” муассасаси ташкил этилган. Давлат раҳбари ундаги шароитларни ҳам кўздан кечирди.
Муассасада уч ёшгача гўдаклар учун эрта аралашув, ногиронлиги бўлган болалар учун ижтимоий мослашув ва реабилитация, шунингдек, кундузги парвариш ва қараб туриш хизматлари ташкил этилган. Ҳозирда бу 80 га яқин инсоннинг оғирини енгил қилмоқда. Уларга 12 нафар малакали ходим меҳр-эътибор кўрсатмоқда.
Изоҳ (0)