Бугун Ўзбекистондаги масжидларда Қуръони каримнинг хатмоналари бўлади, деб хабар бермоқда Мусулмонлар идораси ахборот хизмати.
Қайд этилишича, бугун, 26 март куни Қадр кечаси оқшомида 27 кун давомида 1700 дан зиёд масжидда хушовоз қорилар томонидан ўқилган Қуръони каримнинг хатмоналари бўлиб ўтади. Мамлакат бўйлаб хатми Қуръонлар ўқилган масжидларда фуқаролар бир вақтнинг ўзида хатмонадан кейинги дуоларга қўл очади.
“Уламоларнинг таъкидлашича, Қуръон хатм қилинганидан сўнг қилинган дуо рад этилмайди. Чунки Қуръон Аллоҳнинг каломи бўлиб, уни тўлиқ ўқиб тугатиш улуғ ибодат. Бугун дунёю охират саодатига эришиш учун илтижо қилиш фурсатидир”, дейилади хабарда.
Рамазон ойида 1,7 мингта масжидда Қуръони карим хатм қилиниши айтилган эди.
Кеча, 25 март куни Шавкат Мирзиёев кенг жамоатчилик билан биргаликда ифторлик маросимида иштирок этди. Тадбир аввалида давлат раҳбари халқни ва жамики мусулмон умматини муборак Рамазон ойи билан яна бир бор табриклади.
Мамлакатдаги турли миллат ва дин вакиллари ўртасида аҳилликни кучайтириш мақсадида шу йил сентябрда яна бир тадбир — Тошкент ва Самарқанд шаҳарларида “Декларациялар мулоқоти форуми” ўтказилади. Бу халқаро анжуман турли диний эътиқод вакиллари ўртасида ўзига хос маърифий мулоқот майдони бўлади.
Конституцияга мувофиқ, Ўзбекистон ижтимоий давлат мақомига эга бўлиб, халқчил ва инсонпарвар сиёсат юритилмоқда. Хусусан, ўтган йилнинг ўзида кўмакка муҳтож инсонларга 16 триллион сўмлик моддий ёрдам ва нафақалар берилган. Кам таъминланган оилаларга мансуб 51 минг нафар бола боғчага жойлаштирилган, уларнинг 176 минг нафар аъзосига тиббий кўмак кўрсатилиб, 182 минг нафари ижтимоий хизматлар билан қамраб олинган.
Изоҳ (0)