Фарғона вилоятининг турли ҳудудларида ҳужра шароитида ноқонуний диний сабоқ берганлар қўлга тушди.
Маълум бўлишича, Ёзёвон туманида яшовчи 1991 йилда туғилган фуқаро ўз уйида, ҳеч қандай махсус диний маълумот ва рухсатномага эга бўлмасдан, вояга етмаган 6 нафар болага июнь ойидан буён диний сабоқ бериб келган. Болалар айнан шу хонадонда яшаган.
Шунингдек, Қўштепа туманида ҳам шунга ўхшаш ҳолат қайд этилган. 1975 йилда туғилган аёл ўз яшаш манзилида ҳужра ташкил этиб, Марғилон шаҳрининг турли маҳаллаларида яшовчи 2009–2015 йилларда туғилган қизларга диний таълим берган.
Данғара туманида ҳам рухсатсиз диний сабоқ бериш ҳолати фош этилган. Бу гал 1963 йилда туғилган фуқаро уйида 2011–2015 йилларда туғилган 4 нафар болага диний сабоқ берган.
Бундан ташқари, Фарғона тумани “Водил” маҳалласида жойлашган хусусий ўқув марказида ҳам қонунбузарлик аниқланган. 1997 йилда туғилган фуқаро 28 нафар вояга етмаган болага диний сабоқ бергани маълум бўлди.
Ҳуқуқни муҳофаза қилувчи органлар барча ҳолатлар юзасидан тегишли ҳужжатларни расмийлаштириб, ишни суд органларига юборган.
Ўзбекистонда фарзандини ноқонуний диний таълим олишга жалб этганлик учун маъмурий жавобгарлик белгиланди.
Қонун расмий эълон қилинган кундан эътиборан кучга кирди. Ушбу қонун лойиҳаси 2024 йил 25 июнь куни депутатлар томонидан биринчи ўқишда қабул қилинганди. Олий Мажлис Сенатининг 16 августдаги ялпи мажлисида қонун маъқулланди.
Қонунчилик палатаси спикери ўринбосари Одилжон Тожиев буни айримлар қонунни нотўғри талқин қилаётгани сабаб бола ҳуқуқлари кафолатларини кучайтиришга оид қонун бўйича изоҳ берганди.
“Таълим тўғрисида”ги қонунга кўра, боланинг умумий ўрта, ўрта махсус таълим олишини таъминлаш, унинг интеллектуал, маънавий ва жисмоний ривожланишига шароит яратиш ота-оналар мажбурияти ҳисобланади. Бироқ Одилжон Тожиев ҳозирги кунда болаларнинг ноқонуний диний сабоқ олишига, давлатнинг мажбурий таълим тизими таъсиридан четда қолишига ҳамда уларда бирёқлама дунёқараш ва мутаассиблик кайфияти шаклланишига ота-оналарнинг ўзи сабабчи бўлиб қолаётганини айтганди.
Хусусан, ноқонуний диний таълим бериш асосан ота-оналар ташаббуси билан “ҳужра” шароитида ташкил этилмоқда. Охирги 5 йилда “ҳужра”да диний таълим олган 9 705 нафар бола аниқланган. Аксарият ҳолларда ота-оналар ўз болаларини диний таълим бериш ҳуқуқи бўлмаган ташкилот ёки шахс ихтиёрига бир неча ойга қаровсиз ташлаб кетиши кузатилмоқда. Бу орада бола тўлақонли шахс сифатида ривожланиши учун зарур бўлган муҳитдан узилиб қолмоқда.
Юқоридаги хатти-ҳаракат юридик тилда “болани қонунга хилоф равишда диний таълим олиш жараёнига жалб қилиш”деб баён қилинган. Қисқа қилиб айтганда, ота-она боласини ъҳужраъга топширса, жавобгар бўлади. Ҳужралар фаолияти эса кўп йиллардан бери қонун билан қатъий тақиқланган, деган эди Одилжон Тожиев.
Шунингдек, бу нарса ота-онанинг ўз фарзандига диний сабоқ, таълим-тарбия беришига умуман алоқаси йўқлигини, чунки бу ҳар қандай ота-онанинг ўз фарзандини шахсан ўзи тарбия қилиш бўйича дахлсиз ҳуқуқи ҳисобланишини қайд этиб ўтганди.
- Андижон ва Хоразмдаги ноқонуний ҳужраларда таҳсил олаётган болаларга жароҳат етказилгани аниқланди.
- Фарғонада болаларга ноқонуний диний сабоқ бераётган шахс ушланди.
- Фарғонада ҳужра ташкил қилиб, ноқонуний диний сабоқ бераётганлар қўлга тушди.
- Қўқонда “Ҳизб ут-таҳрир”нинг яширин гуруҳи аъзолари қамоққа олинди.
Изоҳ (0)