Андижон вилояти ИИБ Терроризм ва экстремизмга қарши курашиш бошқармаси ҳамда ДХХ Андижон вилояти бошқармаси ходимлари ҳамкорлигида олиб борилган тезкор тадбирлар давомида бир қатор ноқонуний диний сабоқ бериш ҳолатларига чек қўйилди. Бу ҳақда вилоят ИИБ ахборот хизмати хабар берди.
Хусусан, Асака туманида яшовчи муқаддам судланган шахс (1971 йилда туғилган) яшаш хонадонида қурилиш ишлари олиб бориш ниқоби остида Андижон ва Наманган вилоятларида яшовчи 9 нафар фуқарога ноқонуний диний сабоқ бериб келаётгани аниқланган.
Шунингдек, Андижон туманида яшовчи муқаддам ноқонуний диний сабоқ бериш билан шуғуллангани учун маъмурий жавобгарликка тортилган 49 ёшли аёл яшаш хонадонида тўрт нафар 6-7 ёшли болага ноқонуний диний таълим бериб келган.
Ушбу шахсларга нисбатан Жиноят кодексининг тегишли моддалари билан жиноят иши қўзғатилган.
Яна бир ҳолатда Булоқбоши туманида яшовчи шахс (1975 йилда туғилган) моддий манфаатдорлик эвазига ўзининг яшаш хонадонида олти нафар вояга етмаган қизга махсус диний маълумоти бўлмай туриб, диний таълимдан сабоқ бериб келаётгани аниқланган ва унга нисбатан маъмурий жавобгарлик масаласи кўриб чиқилган.
Бундан ташқари, Балиқчи туманида яшовчи 53 ёшли шахс Қашқадарё вилоятидан келган саккиз нафар мактаб ўқувчисига ноқонуний диний сабоқ бериб келаётгани аниқланган ва унга нисбатан қонуний чора кўрилган.
Аввалроқ Фарғонада 20 нафар фуқарога ноқонуний диний таълим бериб келган шахс 15 суткага қамалгани, Тошкентдаги ўқув марказда 43 ва 19 ёшли аёллар ноқонуний диний таълим бергани аниқлангани, Сурхондарёда уйида вояга етмаган болаларга диний сабоқ берган эркак жаримага тортилгани тўғрисида хабар берилганди.
Изоҳ (0)