Ўзбекистонда йил бошидан солиқ ҳуқуқбузарликлари ҳақида 54 мингдан ортиқ мурожаат келиб тушди. Бу ҳақда Солиқ қўмитаси маълумотларида келтирилган.
Унга кўра, 2025 йилнинг январь—июнь ойларида “Солиқ” мобил иловасининг “Солиқ ҳамкор” тизими орқали солиқ ҳуқуқбузарликлари ҳақида 54 401 та мурожаат келиб тушган.
Шундан:
- 49 015 таси харид чеки бермаслик;
- 1 898 таси тўловни пластик карта орқали қабул қилмаслик;
- 126 таси пластик карта учун харид суммасини ошириш;
- 3 362 таси бошқа турдаги ҳуқуқбузарлик ҳолатлари бўйича.
Мурожаатларнинг 26 155 таси такрорий бўлгани ёки шикоят келиб тушган тадбиркорлик субъектида текширув давом этаётгани сабабли кўриб чиқилмаган. Мурожаатлар асосида 21 702 та сайёр солиқ текшируви ўтказилиб, 99,1 фоиз ҳолатда ҳуқуқбузарлик тасдиқланган.
Ҳуқуқбузарлик ҳолатлари бўйича хабар берган фуқароларга 24 762 та ҳолат бўйича (ундирилган жарима суммасидан 20 фоиз) 17,7 миллиард сўм мукофот тўланган. Энг кўп мукофот пули Тошкент шаҳрида келиб тушган мурожаатчиларга берилган — 4 миллиард 279 миллион 500 минг сўм. Энг ками эса мурожаатлар сони ҳам кам бўлган Жиззах вилояти аҳолисига тўланган — 512 миллион сўм.
Ўзбекистонда солиқ ҳуқуқбузарликларидан ташқари, сув хўжалиги соҳасидаги ҳуқуқбузарликлар тўғрисидаги фото ва видео юборганлар, ернинг ўзбошимчалик билан эгаллаб олиниши ҳақида хабар берган, дарахтларни ноқонуний кесиш ҳолатларини фото ва видеотасвирга олиб жўнатган фуқаролар рағбатлантирилади. Шунингдек, электр ва газдан фойдаланиш қоидабузарликлари ҳақида, ер қаъридан фойдаланиш қоидабузарликлари ҳақида хабар берганлар рағбатлантирилади.
Изоҳ (0)