2025 йил 11 июль куни Ўзбекистон президенти томонидан солиққа оид низоларни судгача ҳал қилиш тартибини соддалаштиришга қаратилган қарор қабул қилинди. Бу орқали тадбиркорлар ва солиқ органлари ўртасидаги тортишувларни судга бормасдан ечиш, вақт ва харажатни камайтириш кўзда тутилган.
Энди Савдо-саноат палатаси ҳузурида солиқ, иқтисодиёт, молия ва ҳуқуқ соҳалари бўйича мутахассислардан иборат Эксперт кенгаши фаолият юритади. Ушбу кенгаш:
- солиқ низоларини кўриб чиқади ва хулоса беради;
- қонунчилик ва унинг амалиётини таҳлил қилиб, таклифлар ишлаб чиқади;
- низоларни кўриб чиқишда бизнес, давлат органлари ва илмий доиралар билан ҳамкорлик қилади.
Кенгаш доимий ишлайди ва ойига камида икки марта йиғилиш ўтказади. Солиқ органлари қароридан норози бўлган тадбиркорлар кенгашга мурожаат қилишлари мумкин бўлади (фақат жиноят иши ва судда кўрилаётган ҳолатлардан ташқари).
Кенгаш хулосалари солиқ ва божхона идоралари томонидан мажбурий тартибда кўриб чиқилади ҳамда тадбиркорга натижа ҳақида маълум қилинади.
Қарор асосида солиқ низоларини судгача кўриб чиқиш жараёни рақамлаштирилиб, тизимга сунъий интеллект жорий этилади. Шу билан бирга, идоралараро электрон маълумот алмашуви яхшиланади, мажлисларда масофадан туриб иштирок этиш имконияти яратилади.
Маълумот учун, 2025 йил 1 июль ҳолатига кўра, Солиқ қўмитасига жами 1,27 трлн сўмлик 109 та солиқ низоси бўйича шикоят келиб тушган. Шундан 75 таси солиқ аудити, 34 таси сайёр текширувлар билан боғлиқ.
Изоҳ (0)