Президент қарори билан ипакчилик ва қоракўлчилик соҳасига тақдим этилган айрим солиқ имтиёзлари муддатларини узайтириш белгиланди. Бу ҳақда Давлат солиқ қўмитаси хабар қилди.
Қайд этилишича, ипак қурти уруғи, тут кўчатлари ва пилла етиштириш, пиллани қайта ишлаш ва тайёр маҳсулотлар ишлаб чиқариш билан шуғулланувчи юридик шахсларни мол-мулк ва ер солиғидан озод этиш имтиёзи 2023 йилдан 2026 йилга қадар узайтирилади. Шунингдек, қоракўлчилик маҳсулотлари ишлаб чиқарувчилари учун ер солиғи ставкасини 2018 йилда белгиланган миқдорда сақлаб қолиш муддати 2026 йилгача узайтирилади.
Қарорда мазкур ўзгаришлардан келиб чиқиб Солиқ кодексига киритиладиган ўзгартириш ва қўшимчалар бўйича қонун лойиҳаси Вазирлар Маҳкамаси томонидан Олий Мажлис Қонунчилик палатасига киритиш белгиланган.
Аввалроқ Ўзбекистонда биринчи чоракда банклар томонидан қарийб 700 млрд сўмлик солиқ тўлангани, маҳаллий тадбиркорларнинг маҳсулотлари учун биржа тўловлари 2 бараварга қисқартирилиши, солиқ ҳуқуқбузарликлари ҳақида хабар берганлик учун пул тўлаш тартиби белгилангани ҳақида хабар берилган.
Изоҳ (0)