«Харид учун чек сўраш ёмон иш эмас» — ДСҚ раиси ўринбосари кэшбэк ва чек атрофидаги «самосуд»ларга муносабат билдирди

Сўнгги вақтда ижтимоий тармоқларда харид учун чек сўраган фуқаролар «самосуд» қилинаётгани тўғрисида хабарлар тарқалмоқда. 28 апрель куни АОКАда бўлиб ўтган матбуот анжуманида Давлат солиқ қўмитаси раиси ўринбосари Жаҳонгир Абдиев мазкур ҳолатга муносабат билдирди.

Жаҳонгир Абдиевнинг айтишича, «самосуд» нормал жамиятларга ёт тушунча.

«Самосуд» яхши тенденция эмас. Ҳамма давлатларда бунинг учун маъмурий ва жиноий жавобгарлик белгиланган. Ривожланган жамиятда «самосуд» деган нарса бўлиши керак эмас. Чунки давлат ва унинг ўрни бор. Ўзимизда шаҳар бедарвоза эмас, деган гап бор-ку. «Самосуд» – кимнингдир айбдор ёки айбдор эмаслигини аниқламасдан туриб, унга нисбатан қандайдир чора кўриш дегани. Ўзимнинг мисолимда айтсам, бир дўкондан харид қилган нарсам учун чек сўрасам, ёмон иш қилган бўламанми? Ёки менга чекимни бермади. Мана шу тадбиркор чекимни бермади, десам. Бу бориб ўша тадбиркорга тўғридан-тўғри жарима қўлланилади, дегани эмас-ку, — деди қўмита расмийси.

«Солиқ ҳамкор» орқали мурожаат қилиниши бу мурожаат холос. Бу қонун бузилиш ҳолати, дегани эмас. Мурожаатга асосан, у ўрганилади. Ўша савдо шохобчаси бор йўқлиги, маҳсулот ҳақиқатда харид қилинган ёки қилинмагани ва бошқа бир қатор масалаларда ўрганиш ўтказилади. Ўрганиш натижасида агар қонун бузилиш ҳолати учраса, кейин чора кўрилади», — деди қўмита раиси ўринбосари.

Маълум қилинишича, бугунги кунга қадар «Солиқ ҳамкор» орқали фуқаролар томонидан 46 минг 325 та мурожаат йўлланган бўлиб, шундан 42 минг 796 таси (92 фоиз) чек бермаслик ҳолати билан боғлиқ. Мазкур мурожаатларнинг 25 минг 283 таси ўрганилган ва уларнинг 98 фоизи (24 минг 637 таси) ўз тасдиғини топган.