Куба меҳнат ва ижтимоий таъминот вазири Марта Елена Феито Кабрера мамлакатда тиланчилар йўқлигини, фақат ўзини тиланчидек кўрсатаётган одамлар борлигини айтгани сабаб истеъфога чиқди. Бу ҳақда Al Jazeera хабар берди.
Мамлакат ҳукумати 16 июль куни ижтимоий тармоққа жойланган постда Феито холислик ва сезгирликнинг етишмаслиги туфайли ўз хатоларини тан олгани ва истеъфога чиқишга ариза берганини маълум қилган.
Феито Миллий ассамблея қўмитасида депутатларга давлатдаги қашшоқлик ҳақида нутқ сўзлаганда қуйидаги фикрларини айтганди.
“Тиланчиларга эътибор берганмисиз? Афтидан тиланчига ўхшайди. Лекин уларнинг қўллари ва кийган кийимларига қарасангиз, асло ундай эмас. Улар гадой қиёфасида, холос, ҳақиқий тиланчи эмас. Кубада гадойлар йўқ”, деган эди Феито.
Собиқ вазирнинг қўшимча қилишича, автомобиль ойналарини тозаловчилар осон ҳаёт кечиради ва топган пулларини спиртли ичимликлар ичишга сарфлайди. У, шунингдек, ахлат титувчиларни танқид қилиб, улар маҳсулотларни қайта сотиш ва солиқ тўламаслик учун ишлаётганини айтган.
Вазирнинг бу гаплари тезда оммалашиб, сўнгги йилларда оғир иқтисодий вазиятни бошдан кечираётган мамлакатда Феитони импичментга ундаган. Ҳатто Куба президенти Мигел Диас-Канел ҳам уни танқид қилган.
“Заифликни бартараф этишда объективликнинг йўқлиги ачинарли. Революция ҳеч кимни ортда қолдиролмайди. Бизнинг шиоримиз ва жанговар масъулиятимиз ана шундан иборат”, деган президент.
Куба бугунги кунда оғир иқтисодий инқирозни бошдан кечирмоқда. Бу қийинчиликларга COVID-19 пандемияси, АҚШ санкциялари ва иқтисодиётни нотўғри бошқариш сабаб бўлмоқда.
Озиқ-овқат, дори-дармон ва бошқа зарур маҳсулотларнинг танқислиги қашшоқликка йўл очган. Мамлакатдаги юқори инфляция харидни камайтириб юборган. Бу эса одамларнинг асосий эҳтиёжларини қоплашни қийинлаштирган. Экспертларнинг фикрича, Кубада иқтисодий ислоҳотларнинг йўқлиги ва эскирган иқтисодий моделга таяниш вазиятни янада оғирлаштирмоқда.
Изоҳ (0)