Ўзбекистонда «Солиқ ҳамкор» орқали мурожаат юборилган 10 205 та ҳолатда 5,7 миллиард сўм мукофот пули тўланган. Бу ҳақда АОКАда Давлат солиқ қўмитаси раиси ўринбосари ва мутасаддилари иштирокида ўтказилган матбуот анжуманида маълум қилинди.
Фуқаролар 2022 йил 1 январдан бошлаб «Солиқ ҳамкор» тизими орқали қуйидаги ҳолатлар юзасидан хабар берганда ҳуқуқбузарлардан ундирилган жариманинг 20 фоизи миқдорида мукофотланмоқда:
- назорат касса техникаси ва тўлов терминалларини қўллаш тартибини бузганлик;
- ноқонуний тадбиркорлик фаолияти;
- тўлов терминаллари орқали сотиладиган товарларнинг нархни сунъий ошириш ҳолатлари.
Йил бошидан буён келиб тушган жами мурожаатларнинг 19 061 таси такроран юборилгани сабабли рад этилган, 1 981 таси текширув жараёнида. Бугунги кунда мурожаатларнинг 25 283 таси ўрганилган ва уларнинг 98 фоизи (24 637 таси) ўз тасдиғини топган. 646 та мурожаатда қайд этилган ҳуқуқбузарлик тасдиқланмаган.
«Солиқ ҳамкор» орқали мурожаат юборган фуқароларнинг 10 205 нафарига 5,7 миллиард сўм мукофот тўлаб берилган.
Аввалроқ Ўзбекистонда истеъмолчиларга йил бошидан буён 68 миллиард сўм кэшбэк тўлангани, Бухорода харид чекини бермаган савдогар бу ҳақда солиқчиларга хабар қилган харидорни калтаклангани тўғрисида хабар берилганди.
Изоҳ (0)