Таиланд шарафини ҳимоя қилган 105 ёшли спортчи Саванг Жанпрам Тайванда бўлиб ўтган Бутунжаҳон ветеранлар ўйинларида (World Masters Games) тўртта олтин медални қўлга киритди, деб ёзади People.
У мусобақаларда энг кекса спортчи бўлиб, “100 дан ошганлар” тоифасида ягона иштирокчи эди. Яъни у тегишли тоифада бош совринни олиш учун фақатгина финишгача етиб бориши керак эди. Жанпрам найза ва диск улоқтириш, 100 метрга югуриш ва тош отиш мусобақаларида ҳам қатнашди.
Умуман олганда, Жанпрамнинг Жаҳон ветеранлар ўйинларида 60 та медали бор. Чемпион ғалабани 73 ёшли қизи Сирипан билан бирга нишонлади — у ҳам мусобақада қатнашиб, учта медални қўлга киритди.
Жанпрам аввал мактаб директори бўлган. У нафақага чиққанидан сўнг, 80 ёшга кирганида спортга қизиқа бошлаган, мусобақаларга эса 90 ёшдан кейин қатнаша бошлаган.
“У 80 ёшга тўлганида, кўплаб дўстлари касаллик туфайли тўшакка михланиб қолганини кўрди ва шундан сўнг енгил атлетика билан шуғулланишни бошлади”, дейилади мақолада.
Ҳозирда 105 ёшли спортчи ҳафтасига 3-4 марта югуришга чиқади ва ҳар куни уйининг атрофида сайр қилади.
Бутунжаҳон ветеранлар ўйинлари ҳар тўрт йилда бир марта ўтказиладиган халқаро мусобақадир. Танловда 30 ёшдан ошган шахслар иштирок этиши мумкин. Ўйинларнинг мақсади ўрта ва кекса ёшдаги спортчиларни ўз карьерасини давом эттиришга ва саломатлиги билан шуғулланишга ундашдан иборат.
Изоҳ (0)