Тошкент Молия институтида “Талабалар лигаси” спорт мусобоқаси старт олди

Тошкент молия институти ўқитувчилар ва талабалар ўртасида соғлом турмуш тарзини тарғиб қилиш мақсадида турли спорт тўгараклари ва мусобоқаларини ташкил этиб келмоқда. Бу гал ҳам институт миқёсида доимгиданда каттароқ ва қизиқарлироқ бўлган спорт мусобоқаси — “Талабалар лигаси”га старт берилди. Мусобоқа аввалида институт спорт мажмуасида тантанали тадбир ўтказилди. Унда олийгоҳ раҳбарияти, спорт усталари, таниқли санъаткорлар ва талаба–ёшлар жам бўлди. Меҳмонлар иштирокчиларга омад ва зафарлар тилади.

“Талабалар лигаси” мусобоқалари институтимизда илк бор спортнинг футбол, баскетбол, волейбол, стол тенниси, шахмат турлари бўйича уюштирилди. Ҳозирда бизнинг олийгоҳда 15 минг нафарга яқин талабалар таҳсил олмоқда. Барча ёшларимизни ушбу мусобоқага жалб этганмиз. Ўйлайманки, бу беллашувлар талабаларнинг спортга бўлган қизиқишини анча кучайтиради. Барчаларига омад тилаймиз”,—деди институт ректорининг биринчи ўринбосари Комила Каримова.

Тантанали тадбирда меҳмон бўлган боксчи, олимпиада чемпиони Фазлиддин Ғойибназаров мусобоқа тўғрисида ўз фикрларини билдирди.

“Бугунги очилиш маросими жуда ҳам чиройли ўтди. Тошкент молия институти сифатли таълим бериш билан бирга спорт бўйича ҳам фаол ҳисобланади. Олийгоҳда кўплаб мусобоқаларда чемпионликни қўлга киритган талабалар таҳсил олади. Бугун ташкил этилган мусобоқа ҳам ёшлар учун жуда фойдали бўлади деб ўйлайман. Талабалар ўзлари учун яратилган бу каби имкониятлардан унумли фойдаланишларига ишонамиз”, —деди спортчи.

Тошкент молия институтида спортнинг ўнлаб турлари билан шуғулланиш учун шарт–шароитлар яратилган. Яқинда институт спорт мажмуасининг тренажёр зали учун янги жиҳозлар олиб келинди. Мажмуада кўплаб талабалар дарсдан бўш вақтларида спорт билан мунтазам шуғулланади.

Улар халқаро ва республика миқёсидаги мусобоқаларда ҳам фаол иштирок этиб келмоқда. Масалан, 2022-2023 ўқув йили давомида 100 нафардан ортиқ ёшлар туман, шаҳар, республика ва халқаро спорт мусобақаларида юқори натижаларни қайд этган. Улардан уч нафари устаси унвонини қўлга киритди.

Умуман олганда, Тошкент молия институтида талабаларга нафақат замонавий билим ва кўникма бериш, балки уларнинг саломатлигини таъминлаш учун ҳам етарли имкониятлар мужассам. Бешта спорт тури бўйича ташкил этилган “Талабалар лигаси” спорт мусобақалари ҳам ана шундай имкониятлардан биридир.

Реклама ҳуқуқи асосида.