Ўзбекистон футбол ассоциацияси Этика қўмитасининг навбатдаги йиғилиши бўлиб ўтди. Бу ҳақда Ўзбекистон футбол ассоциацияси матбуот хизмати хабар берди.
Унда Ўзбекистон Профессионал футбол лигасининг 2025 йилнинг 9 январида юборган 01/10-сонли хатига асосан Ўзбекистон футбол ҳакамлари маркази ҳакамлари Азиз Асимов, Раҳим Каримов, Акобирхўжа Шукуруллаев, Абдурашид Худойберганов ҳамда Фирдавс Норсафаровларнинг спорт мусобақалари натижаларига таъсир ўтказишга алоқадорлиги тўғрисидаги иш кўриб чиқилган.
ЎФА Этика қўмитасига тақдим этилган ҳужжатларга асосланиб, қўмита томонидан Ўзбекистон футбол ҳакамлари маркази собиқ ҳакамлари Азиз Асимов ва Раҳим Каримовлар фаолиятида йўл қўйган хато ва камчиликлари учун ҳакамлик фаолияти тугатилгани, шунингдек, фаолиятида техник хатоларга йўл қўйган ҳакамлар Акобирхўжа Шукуруллаев, Абдурашид Худойберганов ҳамда Фирдавс Норсафаров эса ҳакамлик фаолиятидан маълум муддатга четлаштирилганлиги аниқланди.
ЎФА Махсус инспекцияси томонидан номлари юқорида келтирилган ҳакамлар билан профилактик ва тушунтириш ишлари олиб борилган ҳамда улар ўз фаолиятида йўл қўйган хато ва камчиликларини тўлиқ тушуниб етганлар. Шунингдек, келгусида юзага келиши мумкин бўлган бу каби ҳолатларни олдини олиши бўйича барча имкониятларини ишга солишини билдириб ўтганлар.
Этика қўмитаси томонидан Ўзбекистон футбол ҳакамлари маркази ҳакамлари Акобирхўжа Шукуруллаев, Абдурашид Худойберганов ҳамда Фирдавс Норсафаровларга нисбатан вақтинчалик Ўзбекистон футбол ҳакамлари маркази томонидан Суперлига, Пролига, Биринчи лига, Ўзбекистон кубоги ва Суперкубоги каби мусобақаларда фаолият олиб боришга нисбатан қўлланилган чекловлар (четлатишлар) муддати тугаганлиги боис, уларнинг ҳакамлик фаолиятини қайта тикланиши таъминланиши бўйича қарор чиқарилди.
Изоҳ (0)