Англия Премьер Лигаси “Челси”нинг Роман Абрамович давридаги махфий офшор компанияларга қилган тўловларини текширмоқда.
Daily Mail нашрининг хабар беришича, клубнинг янг хўжайинлари уни сотиб олиш жараёнида бир қанча тартибсиз битимларни аниқлаган ва бу ҳақида Англия футбол ассоциацияси (ФА), Премьер Лига ва УЕФАни хабардор қилган.
Қоидалар бузилиши Абрамович даврида содир бўлган бўлса-да, “Челси” Премьер Лигадан жарима ва очколардан маҳрум қилиниш шаклида жазоланиши мумкин.
Ишдан хабардор манбаларнинг баёнига кўра, олтига яқин офшор компанияларга тўловлар аниқланган. Миллионлаб ҳисобланган тўловлар ФА, АПЛ ва УЕФАга тақдим этилган молиявий ҳисоботда рўйхатга киритилмаган футболчиларнинг трансфери билан боғлиқ.
Бундан ташқари офшор компанияларининг бир қисми футбол агентлари ва воситачилари билан, баъзилари эса Россия билан алоқадор бўлган, аммо бошқа компаниялар ортида ким турганини аниқлашнинг имкони бўлмаган.
Эслатиб ўтамиз, 2022 йилнинг баҳорида россиялик тадбиркор Роман Абрамович “Челси”ни сотиб юборганди. Тод Боули бошчилигидаги консорсиум “аристократлар”нинг янги хўжайинига айланган.
Изоҳ (0)