Футбол бўйича Жаҳон Чемпионати 3-саралаш босқичи доирасида Ўзбекистон ва Қатар учрашуви олдидан терма жамоалар вакиллари иштирокида матбуот анжумани ўтказилмоқда.
Дастлаб Қатар терма жамоаси бош мураббийи Хулен Лопетеги ва футболчи Абдулазиз Ҳатим анжуманда иштирок этди. Хулен Лопетеги сўзининг аввалида Ўзбекистон миллий терма жамоасини Жаҳон чемпионати йўлланмасини қўлга киритгани билан табриклади.
Бу жуда катта ютуқ ва жамоа бунга тўлиқ муносиб эди. Биз гуруҳдаги энг кучли жамоалардан бирига қарши ўйнаймиз. Мундиалга йўл очилишига кичик имкониятимиз сақланиб қолган, шунинг учун эртанги ўйинда бошқа футболчиларимизни синаб кўриш имконияти ҳам бўлади, деди мутахассис.
Лопетеги ўзбекистонлик футболчилар Европанинг етакчи лигаларида фаолият юритаётганини таъкидлади.
Эртанги ўйинни жуда жиддий қабул қилишимиз керак, чунки бу баҳс октябрь ойида бошланадиган плей-офф босқичига дастлабки тайёргарлик учун хизмат қилади. Имкониятимиздан максимал даражада фойдаланиб, ғалаба учун курашамиз. Ўтган учрашувлар ҳақида гапирмоқчи эмасман, бор эътиборимиз эртанги ўйинга қаратилган, деган мураббий.
Қатар терма жамоаси аъзоси Абдулазиз Ҳатим эса Осиёнинг энг кучли жамоаларидан бирига қарши баҳс олиб боришини таъкидлади.
Икки жамоа ўртасидаги учрашувлар доимо муросасиз кечган. Плей-офф босқичига йўл олдик, шунинг учун эртанги ўйинни келаси босқич учун дастлабки тайёргарлик ўйини бўлади. Бу биз учун жуда муҳим ўйин, чунки рақибимиз Жаҳон чемпионати йўлланмасини қўлга киритган. Уларнинг футболчилари жисмонан ҳам, руҳий жиҳатдан ҳам кучли, бироқ биз ғалаба қозониш учун бор имкониятимизни ишга соламиз, дейди футболчи.
Изоҳ (0)